Sagardoak zipriztindu ditu bazterrak
Txiki gelditu da Agirre Lehendakariaren plazan antolatzaileek jarritako karpa arratsaldean. Atertu ez badu ere sagardoa bota eta bota aritu dira 28 postuetan ari diren boluntarioek.
Euria ez da oztopo izan sagardozaleentzat. Txiki gelditu zaie karpa. Giro makurrak ez du arratsaldean ere festa gogoa itzali, eta eguerdi partean baino jende gehiago gerturatu da Agirre Lehendakariaren plazan antolatzaileek jarri duten karpara. 18:00etan egin dute eguneko bigarren txotx ofiziala, eta orduan baino lehen hasi da pixkanaka gerturatzen jendea, euripean, Agirre Lehendakariaren plazara. Txalapartariekin hasi da arratsaldeko festa tartea, eta Jare Antzizar eta Julen Olaizola Xenpelar Bertso Eskolako bertsolariek hartu dute hitza ondoren, kantuan. Antolatzaileek ere hartu dute hitza, eguerdian bezalaxe, Nerea Izagirrek eman die ongi etorria bertaratutako guztiei eta jaiaz gozatzera deitu.
Arratsaldeko hitzartzean ere, mezua argia, indarkeria sexista, homofobo eta arrazistek ez dutela Sagardo Egunean, ez herrian lekurik. Gozatzeko deia, bai, baina ingurua eta ingurukoak errespetatuta. Txotxerako deia egin du Izagirrek bertaratutakoen txalo artean, eta eguerdian egin moduan Pili Pascual Iriberriren irrintziak eman dio festari berriz ere hasiera.
Errifaren sariduna ere jakinarazi dute dagoeneko: 6.481 zenbakidun txartelaren jabearentzat izango da saria.
HITZAk arratsaldean Sagardo Egunaren bueltan zegoen giroa jaso du ondoko argazki galerian eta bideoan.
