Herritarrak erdigunean jartzeko, OiartzuaRock
Bihar egingo dute OiartzuaRock-en zazpigarren ekitaldia, eguerdiko hamabietan hasita. Zortzi kontzertu izango dira Kontzejupean egunean zehar, baita bazkaria ere.
OiartzuaRock jaialdiko aurreko edizio bateko irudia.Imanol Saiz Duela zazpi urtetik herriko taldeak erdigunean jartzeaz arduratzen den jaialdia da OiartzuaRock, eta aurtengoan ere euren jardunarekin jarraitzeko asmoa erakutsi dute Alain Mendizabal eta Endika Loiola egitasmoaren antolatzaileek.
Oiartzungo Gure Eskurekin batera, 2016an erabakitze eskubidearen aldeko egun bat antolatu zuten herriko musikariek, eta herriko sei taldek eman zuten kontzertua egun horretan Elizalde Herri Eskolako frontoian. “Formatua asko gustatu zitzaigun; polita izan zen herriko taldeek elkarlanean zerbait antolatzea”, kontatu du Loiolak. Egun horretan jaio zen gaur egun OiartzuaRock deitzen den jaialdia, 2017an egin baitzuten lehen aldiz.
Alain Mendizabal Txilly izan zen lehen edizio horretan abesteko deitu zuten musikarietako bat, eta hari ere formatua “asko” gustatu zitzaion. Gainera, gaztetxeko kidea ere bazen ordurako, eta azaldu du 2018. urteko jaialdia gaztetxetik antolatzeko ardura hartu zutela. Hor dabil, buru-belarri, gaur egun arte, antolakuntzan.
Aurtengo jaialdia bihar –hilak 3, larunbata– izango da, Kontzejupean, eta dagoeneko aurkeztu dute antolatzaileek hitzordu horretako egitaraua. Egitasmo horrek, haatik, badu betekizunik: bata da ezin dutela bi urtez jarraian talde berberek jo; bestea, berriz, taldea edo taldeko kide bat gutxienez oiartzuarra izatea.
Endika Loiola: “Bigarren irizpide horrekin jendea harritu egiten da, egitarauaren bidez ikusten baitute herrian proiektu asko daudela eta jende asko dagoela musika taldeetan-eta jotzen. Hori, guretzat, oiartzuar moduan, harro sentitzeko modukoa da”.
Noski, horrek bere arrazoia duela aipatu du oiartzuarrak: “Askotan aipatzen da Oiartzunen musikari asko daudela, baina normalean bakoitzak bere ibilbidea egiten du eta ez dute amankomunean ezer egiten. Beraz, herrian zehar sakabanatuta dauden taldeak erdigunera ekartzea, plazara ekartzea, eta presentzia ematea da helburua. Denak hitzordu horren bueltan elkartzeko plaza bat da OiartzuaRock”, azaldu du Mendizabalek.
Emakumeen presentzia areagotzen
Urtero aldatzen dute OiartzuaRock-en kartela, baina azken urteetan “saiakera berezi bat” ari dira egiten emakumeen presentzia bermatze aldera. Loiolak azaldu du aurtengo edizioan parte hartuko duten emakume eta gizonen arteko kopurua oso berdintsua dela, eta hori “jaialdi gutxitan” gertatzen dela.
Ildo horretatik, beraz, Mendizabalek nabarmendu du lehenbizi emakumeak zeuden edota emakumez osatutako taldeengana jo dutela. “Bestalde, musikan dabiltzan edota etorkizunean musikan ariko direnentzat ere emakume hauek eredugarri izatea nahi dugu. Senti dezatela eurek ere OiartzuaRock-eko plazan jotzeko aukera dutela”, jarraitu du Mendizabalek.
Aurtengo jaialdia “anitza” izango dela aurreratu du bikoteak: “Uste dut horrek erakutsaraziko duela Oiartzunen bertan dauden joera ezberdinak. Gainera, denak jarraian entzuteko aukera ez da oso ohikoa izaten”, zehaztu du Mendizabalek.
Egitaraua
• 12:00. Alargun Beltzak.
• 14:00. Bazkaria.
• 16:30. Lohizune eta Izaro.
• 17:30. Hecetu Welo.
• 18:30. Peppermint Sextet.
• 19:30. Northecko.
• 20:30. Gorroto Bala.
• 21:30. Oiartzungo Panterak.
• 22:30. Kloakass Sessions.
