Hileta zibilak egiteko aukera izango da Arizmendienean eta udalean
Beilatokiaz gain, Arizmendieneako lorategia eta udaletxeko areto nagusia erabiltzeko aukera izango dute herritarrek hiletak edota omenaldiak egiteko.
Oiartzungo Udalak jakinarazi duenez, hileta edo omenaldi zibilak arautzeko ordenantzari hasierako onarpena eman zioten pasa den asteazkeneko udal osoko bilkuran, eta azaldu dutenez, beilatokiaz gain, agurrak egiteko beste bi leku jarriko dituzte herritarren eskura: Arizmendieneako lorategia eta udaletxeko areto nagusia.
Ildo horretatik, Joana Mendiburu Oiartzungo alkateak adierazi du ohituren eta ekintza sozialen adierazpenak etengabe aldatzen ari direla. “Jendartea plurala da, aniztasun ideologikoa, erlijiosoa eta kulturala da nagusi eta maite ditugunak agurtzerakoan ere behar ezberdinei erantzungo dien espazioak jarri nahi ditugu oiartzuarren eskura”.
Era berean, beilatoki publikoa egin zenetik toki hori hileta zibilak eta omenaldiak egiteko “geroz eta gehiago” erabiltzen dela gehitu du. “Leku aproposa eta ingurua goxoa da, eta aukera ematen du zeremonia duina, pertsonala eta hunkigarria eskaintzeko”, gehitu du. Hortaz, “modu naturalean” sortu den erabilera erraztu eta espazio berriak eskaini nahi dituzte.
Oiartzungo Udaletxean egin behar da gune horiek erabiltzeko eskaera; baina, agurra gorpua beilatokian dagoenean egingo bada, ez da erreserbarik egin beharko. Haatik, azaldu dute Arizmendieneako edota areto nagusiko omenaldietan gorpuak ezingo duela bertan egon.
Espazio horien erabilera nolakoa izango den jasotzen duen ordenantza berria aho batez onartu zutela kontatu dute, eta proposamena jendaurrean jarriko dutela esan dute 30 egunez ekarpenak egin ahal izateko.
Bestalde, udalbatzarrean landutako gainontzeko gaiak ere aho batez onartu zituzten zinegotziek. Apirileko protokolo gastuak 42,11 euro izan ziren, bidaietan.
