Trintxerpe-Illunbeko arraunlariak, egurrean beteranoen ligan
Traineruen beteranoen ligan bi traineru ditu Trintxerpe-Illunbek, gizonena eta emakumeena. Ekainaren 21erako antolatzen ari dira herriko estropada.
Trintxerpe-Illunbeko arraunlariak eta laguntzaileak larunbatean Mundakan. Maila bikaina ari dira azaltzen Trintxerpe-Illunberen bi traineruak 2025ko Zipr-18/70 edo arraunlari beteranoen ligan. Asteburu honetan liga horretako bigarren eta hirugarren jardunaldiak jokatu dira Mundakan (larunbatean) eta Hondarribian (igandean, Fortuna KEk) antolatua. Bietan izan da klubeko A ontzia (gizonena) eta Mundakakoan B trainerua (emakumeena).
Emakumeen eskifaia, larunbatean Mundakan.
Emaitzei erreparatuta, gizonen A ontzia laugarren izan da bai Mundakako zein Hondarribiko estropadetan. B ontziaren izaera berezia da: beteranoen liga horretan emakumez soilik osatutako traineru bakarra da trintxerpetarrena, eta gainera, eskifaiako partaide gehienak hasiberriak dira. Meritu handia dute bai gizonek, baina batez ere emakumeek. Gizonen Azkuene ontziak jada urte batzuk daramatza beteranoen liga horretan parte hartzen; emakumeen trainerua lehenengoz ari da lehian.
Mundakako estropadari dagokionez irabazlea Badok 13 trainerua (Zarautz eta Orio), bigarren Fortuna, hirugarren Getxo eta esan bezala laugarren Trintxerpe-Illunbe. B traineruen sailean aritu zen emakumeen ontzi urdina, pixkanaka eskarmentua hartuz eta aldi berean kirolaz era kolektiboan gozatuz. Hondarribiko atzoko (igandea) proban, larunbateko orden berberean iritsi ziren lehen lau traineruak: Badok 13 irabazle, eta jarraian Fortuna, Getxo eta Trintxerpe-Illunbe; emakumeen Azkuene ez zen izan Bidasoko herriko lehian.
Zailtasun handiak izaten ari da bizirauteko Trintxerpe-Illunbe Arraun Elkartea. Tartean, Kaiko Herreran duten egoitza eraistear da. Hala ere, bai gazteen kategorietako lehietan (batelak eta trainerillak) zein beteranoenetan parte hartzen ari da, zailtasun denei erantzunez gogoz, ilusioz eta kirol gosez.
Zipr-18/70 edo arraunlari beteranoen ligak hamabi estropada puntuagarri izango ditu 2025eko sasoian. Hiru jada jokatu dira. Hurrengoa hilaren 11n izango da Sestaon. Trintxerpe-Illunbek ekainaren 21ean antolatuko du ligari dagokion lehia, Illunbeko Beteranoen I. Estropada.
