'Breaker' izaten 40 urte
'Breaker' fanzinearen 40 urteen ospakizun betean dira Antxon. Atzo hitzaldia izan zen, eta bihar (larunbata) Breaker Festen txanda.
Breaker fanzine heavyari gorazarre egunak dituzte Antxon. 40 urte beteko ditu aurten heavy musikaren zaleei informazioa eman, haiek saretu eta mugimendua indartu zuen agerkariak; 1985-1987 epean hamar zenbaki egin eta den-denak zabaldu zituzten. Erreferente izan zen musika estilo horren zaleentzat.
Horren harira hainbat jarduera egiten ari dira Antxon, tartean, atzo arratsaldean Kultur Etxean egin zen hitzaldia: Mikel Kazalisek (Estigia, Anestesia, Kuraia, Negu Gorriak), Felix Lasak (Leize) eta Gonzalo Ibañezek (La Perrera, Nuevo Catecismo Catolico) 40 urtez oholtzetan eta musikaren esparruan bizitakoen berri eman zuten, haien ikuskera pertsonal eta zabaletik. Herriko burdina Euskal Herriko heavy metalaren atariko Inaxio Esnaolak gidatu zuen solasaldia.
Hasierako urratsak, 40 urtez egindakoak, Breaker fanzinearekin izandako hartu-emana, Antxoko sanferminetako heavy jaialdian bizitakoak, egungo musikaren gaineko gogoeta… Bete-bete izan zen Kultur Etxeko ikus-entzuleek gozatu ederra izan zuten haiek esandakoekin. Gainera, Ion Koldo Oleak emandako argazkietan oinarritutako erakusketa ere zabaldu zuten aretoan, Juxe Areta Goñi oreretarrak egokitutakoa.
Hizketaldiaren bukaeran Hardwave talde antxotarrak kontzertu laburra eman zuen.
Bihar, Breaker Fest
Fanzinearen ospakizunen epizentroa bihar (hilak 10, larunbata) izango da. Izan ere, 20:00etan hasita eta Biteri plazan (pilotaleku zaharrean), kontzertu handia izango baita doan Kalean (20:10), Leize (22:10) eta Anestesia (00:25) taldeekin. Breaker fanzinea sortu zutenen desioa da garai bateko, eta egingo heavy musikaren zaleen bilgune izatea bihar Antxo, hurbileko talde horien emaria ardatz izanda.
Jarraian, atzoko solasaldiaren eta erakusketaren hainbat irudi.
