Mugiment Pausu Erronka "osasun fisiko eta emozionala hobetzeko"
Oiartzun, Lezo eta Pasaiako udaletako zenbait ordezkarik aurkeztu dute egitasmoa. Jarduera fisikoaren kultura bultzatu nahi dute.
Hilaren 19tik ekainaren 8ra bitartean izango da Mugiment Pausu Erronka, Jarduera Fisikoaren Orientazio Zerbitzua (JFOZ) duten 50 udalerrien arteko lehiaketa birtuala, eta haren helburua da herritarrek egunerokoan ahalik eta pauso gehien ematea “osasun fisiko eta emozionala hobetzeko eta jarduera fisikoaren kultura bultzatzeko”.
Oiartzun, Lezo eta Pasaiako udalek batera aurkeztu dute egitasmoa, eta horretarako elkartu dira Lezoko Eneritz Arruti zinegotzia eta Maddi Marquet Kirol Orientazio Zerbitzuko (KOZ) arduraduna; Oiartzungo Olaia Lasa ongizate zinegotzia eta Xabier Sanz (KOZ) eta Pasaiako Julen Rodriguez kirol zinegotzia eta Xabi Rodriguez (KOZ).
Erronkatzat baino egunerokoan jarduera fisikoa “modu naturalean integratzeko” aukera modura definitu dute Mugiment Pausu Erronka, eta horrexegatik, hain zuzen, gonbidatu dituzte herritarrak parte hartzera.
Wellk mugikorreko aplikazioaren bidez egingo da erronka, eta parte hartzaile bakoitzak bere udalerriko orientazio zerbitzuarekin bat eginez hartu beharko du parte. Aplikazioak, eguneko, pertsona bakoitzak egiten dituen pauso guztiak kontatzen dituenez, mugikorra soinean eramatea ezinbestekoa izango da. Jardueraren amaieran herri bakoitzeko pauso guztiak gehituko dira, eta pauso gehien lortzen dituen herria izango da irabazlea. Gainera, taldekako eta banakako sailkapenak egongo dira ikusgai denbora errealean, eta zenbait sari banatuko dituzte parte hartzaileen artean.
Erronkaren planteamendua zein den ikusita, jarduera fisikoa egunerokotasunean “modu errazean” txertatzeko aukera “paregabea” dela sinistuta daude ordezkariak; izan ere, ez dago berariaz kirola egin beharrik, nahikoa baita lanera oinez joatean, erosketak egitera joatea edota paseoan ibiltzea. Edonork har dezake parte.
Era berean, uste dute kanpoan egoteko aitzakia ere badela jarduera horretan parte hartzeak suposatzen duena.
Nola hartu parte?
Wellk aplikazio instalatu eta izena eman behar da. Gero, ‘Erronka’ atalean ‘taldeak’ botoia sakatu, eta ‘talde batera batu’ aukeran sakatu behar da gero. Azkenik, ‘Mugiment Pausu Erronak’ ligan norbere udalerria aukeratu behar da.
Hala ere, herri bakoitzeko KOZ zerbitzuak laguntza eskainiko du. Alabaina, informazio gehiagorako, egin klik hemen.
Sariak
Parte hartzen dutenen artean, sari hauek banatuko dituzte:
Banakako sariak: 75 €-ko opari txartelak pauso gehien eman dituzten emakume eta gizonentzat (desgaitasuna duten pertsonentzako kategoria bereziarekin.
Taldekako sariak: Udalerri bakoitzak egindako pausoak/taldeko partaide kopurua. Pauso gehien eman dituzten udalerri horretako 5 pertsonei, eta beste 5 sari udalerriko taldekideen artean zozketa.
