Aiako Harriko Parke Naturalari gorazarre egin diote
Naturarekiko lotura eta kontzientzia sustatzeko antolatu zuten Aiako Harriko Parke Naturaleko Eguna. Aritxulegin izan zen ospakizuna.
Igandean ospatu zuten Aritxulegin Gipuzkoako Foru Aldundiak eta Oiartzungo Udalak elkarlanean antolatutako Aiako Harriko Parke Naturaleko Eguna, eta bertaratu zirenek naturarekin konektatzeko aukera izan zuten egun osoko egitarau bati esker.
Egitaraua antolatu izanak baditu, hots, zenbait arrazoi; horien artean nagusia, honakoa: Aiako Harriko Parke Naturalaren balioak eta funtzioak ezagutaraztea ondare naturalaren babesleku eta aisialdirako zein abeltzaintzako gune bezala. Hala ere, hilaren 1a aukeratu izan ez da kasualitatea, animaliak mendiko larreetara igotzeko sasoia, maiatzean zehar ospatzen diren Natura 2000 eguna eta Europako Natura Parkeen eguna hartu baitzituzten kontuan. Era berean, nabarmendu dute eguna ‘Ipuskoa 1000’ ospakizunaren inguruan antolatu zutela, zehazki, Gipuzkoa izena lehen aldiz dokumentatu zenetik. “Horrek egitasmoari balio historiko eta sinbolikoa ematen dio”, azaldu dute.
10:30ean hasi zuten eguna, eta parte hartzaileek artaldeak eta horiek paisaian duten eragina ezagutzeko aukera izan zuten lehenik. Gero, Basabizin erreskatatutako hegazti bat askatu zuten, eta euskal makila borrokaren erakustaldiaz gozatzeko aukera izan zuten gero. Egunaren amaiera aldean Et Incarnatus taldeko soka boskoteak Menditik itsasoraino dantzan emanaldia egin zuen Migel Zeberioren zuzendaritzaren, eta eguneko azken jarduerak gazta dastaketa eta salmenta izan ziren.
Antolakuntzak bertaratu zirenei zein antolaketa lanetan aritu diren guztiei eskerrak eman nahi izan dizkie egindako lanagatik. Azkenik, azpimarratu dute halako ospakizunek aukera ematen dutela “gure natura parkeen balioa ikusarazteko eta belaunaldi berrien artean kontzientzia ekologikoa sustatzeko”.
