Alaia Martin eta Txosteko pilotariak, Pilota Federazioaren ospakizunean
Gipuzkoako Euskal Pilota Federazioaren 100. urteurrena ospatzeko egitarau oparoa antolatu dute iganderako –hilak 8–, Donostiako Udaletxe aurrean.
Gipuzkoako Euskal Pilota Federazioa (GPEF) mendeurrena ari da ospatzen, eta antolatu duten egitarau oparoko hurrengo ekitaldia asteburuan izango da, hilaren 8an, hain zuen.
Errebote jaialdia izango da zehazki igandeko ekitaldia, eta Donostiako Alderdi Ederren jokatuko dute; gainera, Alaia Martin bertsolaria eta Txosteko pilotariak izango dira hitzordu horretan.
Era berean, Behar Zana eta Zubieta klubetako pilotariak, Beñat Gaztelumendi bertsolaria, Igeldoko trikitilariak, Otero Pilotagileak edota Sarako Eskutik Kooperatiba ere izango dira bertan.
Goizeko hamaiketan hasiko da jardunaldia, eta GPEFren zuzendaritza kide eta Txosteko ordezkari den Andoni Zabalak azpimarratu du “errebotearentzat egun historikoa” izatea nahi dutela.
Egun horretarako bi pareta altxatuko dituzte Kontxa hondartzarantz eta Hernani kalerantz, eta 70 metro luze eta 12 metro zabal izango dituen Errebote Plaza eraikiko dute Alderdi Ederren.
Alabaina, egitaraua 11:00etan hasiko bada ere, ordubete lehenago Bulebarrean elkartzeko deia luzatu dute, handik Alderdi Ederrera kalejira joateko.
