Polizia operazioa Lezon astelehenean: hiru espetxeratu, eta 14 kilo kokaina
Droga trafikoaren kontrako asteleheneko polizia operazioan atxilotutako hiru kideak atzo pasa ziren epailearen aurretik, eta hark espetxeratze agindua eman zuen.
Ertzaintzak konfiskatutako droga eta dirua.Segurtasun Saila Gaur eman ditu Eusko Jaurlaritzako Segurtasun Sailak asteleheneko polizia operazioaren gaineko xehetasunak. Harrabotsa sortu zuen drogaren salerosketaren kontrako operazio horrek, besteak beste Ertzaintzak ustezko trafikatzaileak geldiarazteko tiroak egin zituelako Lopene auzoan. Edonola ere, eta Segurtasun Sailaren arabera operazioak zabalik jarraitzen duen arren, lehen datuak eman ditu. Horien arabera, hiru pertsona espetxeratu dituzte droga trafiko delitua egotzita. Gainera, 14 kilo kokaina eta 10.000 euro ere konfiskatu dizkiete haiei; astelehenean atxilotutakoak, atzo (osteguna) pasa ziren epailearen aurretik. Hark erabaki zuen espetxeratzea.
Segurtasun Sailak jakinarazi du Ertzaintzak hilabeteak zeramatzala Donostian bizi den pertsona bat ikertzen, Espainiako Penintsula hegoaldetik kokaina jaso eta bereziki prestatutako ibilgailu batean Gipuzkoara garraiatzen zuelakoan. Hain zuzen, astelehenean ibilgailu hori atzeman zuen Ertzaintzak Lezon (Altamirako biribilgunean kale-argia jo, eta istripua izan zuena), eta hor topatu zituzten bai konfiskatutako kokaina zein dirua. Gainera, auto horren laguntzan zihoan beste ibilgailu baten gidaria ere atxilotu zuten agenteek; atxilotutako hirugarren pertsona ustez droga jaso behar zuena zen.
Segurtasun Sailak adierazi du Gipuzkoan, Bizkaian, Araban eta Frantziako estatuan ere banatzen zutela droga jada espetxean direnek, eta atzemandako 14 kilo horien salmentagatik milioi bat euroko etekina aterako luketela. “Ikerketak zabalik jarraitzen du, eta ez da baztertzen atxiloketa gehiago egitea”, adierazi du Segurtasun Sailak.
