Izaskun Zubizarreta gogoan, Iratxe Etxegoien eta Hodei Lujanbio Intxitxu Trailen garaile
Gaur goizean izan da Intxixu Trail mendiko lasterketaren hamargarren ekitaldia. Irteeran Izaskun Zubizarreta izan dute gogoan.
Gaur sariak bere egin dituztenen talde argazkia.Intxixu Trail Iazko udan zendu zen Izaskun Zubizarreta Gerendiain oiartzuarra. Goi mailako kirolaria, hutsune nabarmena utzi zuen herrian, eta herriko kirolean. Asko eta asko izan ziren hark lortutakoak mendiko lasterketetan batez ere, emakumeen artean diziplina horretan bidea egin zuen lehenetarikoa izan zen. Tartean, lehen Intxixu Trailak irabazi zituen, bide motzeko ibilbidekoa eta luzekoa. Horregatik, gaur, X. Intxixu Trail hasi baino lehen gogoan izan dute antolatzaileek Zubizarreta, eta haren senideei oroitzapen eta esker on lore sorta eman diete; Zubizarretaren ahizpek, bikotekideak eta ilobak jaso dute, zeharo emozionatuta, aitortza sorta. Aurretik Esteban Martiarenak bertsoak eskainiak zizkien, eta Olarriko dantzariek ohorezko Agurra aurrez aurre emana.
Kirol arloari dagokionez, emakumeetan Iratxe Etxegoien lezoarra eta gizonetan Hodei Lujanbio goizuetar oiartzundua izan dira X. Intxixu Trailen irabazle. Dortsal guztiak aspaldi salduak zituzten antolatzaileek. Arrakastaren zati bat, beraz, 250 korrikalariak lehian hasi aurretik bazuten. Arrakastaren beste zatia da mendiko korrikalariek, mendiko korrikalarientzat antolatutako lasterketa dela. Hau da, mimoz zaintzen dituztela partaide guztiak, antolatzaileek badakitelako ondo asko gainera zer den horrelako probetan aritzea. Izen emateetan, oiartzuar asko eta asko. Lasterketa hasi eta bukatu den Ergoiengo Uztapide plazan, eta lasterketaren 16 kilometroak joan diren Aiako Harri Parke Naturalean ere oiartzuarren presentzia handia, lasterketaren motorra Intxixu Trailekoak badira, herritarren auzolan grinagatik ere badelako gozo lasterketa.
Esan daiteke erraz samar irabazi dutela bai Etxegoienek nahiz Lujanbiok. Lezoarrak minutu dezenteko aldea atera dio bigarren emakumeari; Lujanbiok haren segidan izan denari tarte oso-oso handia ez dio atera, baina azken kilometroak lasai egiteko aukera izan du. Erne, emakumeen podiumean oiartzuar bat izan delako: Leire Urritegi bigarren izan da.
Jarraian, gaurko sailkapen nagusiak, eta beherago, lasterketaren irteera-helmuga puntuan izan den giroa baita gizonen nahiz emakumeen kategorietako hiru lehenen argazkiak ere; nola ez, Zubizarretaren senideen argazkia ere ageri da
Emakumeen podiuma
- 1. Iratxe Etxegoien Errandonea (Lezo) 1.35.30
- 2. Leire Urritegi Getaria (Oiartzun) 1.40.01
- 3. Koro Astiz Andoaga (Hernani) 1.42.14
Gizonen podiuma
- 1. Hodei Lujanbio Apezetxea (Oiartzun) 1.16.22
- 2. Josu Urrestarazu Garcia (Idiazabal) 1.17.36
- 3. Oihan Sayar Garcia (Irun) 1.18.14
Oiartzuar onenak
- Leire Urritegi Getaria eta Hodei Lujanbio Errandonea
Taldekako sailkapenean irabazlea
- Intxixu Trail taldea
Sailkapen osoa ikusteko
