Emakumeen taldeak sortu nahi ditu Pasaia Kirol Elkarteak
Erregionalean eta Haur Txiki mailan sortu nahi ditu taldeak Antxoko futbol klubak. Ostiralean informazioa emango diete hala nahi dutenei.
Don Boscon egingo dute emakumeen taldeak sortzen hasteko informazio bilera. Zuzendaritza aldaketa izan da Pasaia Kirol Elkartean. Hala, Antxoko futbol klubeko arduradun berrien asmoetako bat da emakumeen taldeak sortzea. Horregatik, ostiralean (hilaren 13an) Antxoko taldean futbolean aritu nahi duten emakumeei begirako informazio saioa antolatu dute, 19:00etan, Jesus Mari Zamora futbol zelaian (Don Boscon).
Hasteko, bi talde sortzeko asmoa azaldu du klubak. Lehena Gipuzkoako Erregionalean arituko litzatekeena da, beraz, 16 urtetik gorakoen taldea izango litzatekeena. Bestea harrobiko taldea litzateke, Haur Txiki (Infantil Txiki) mailakoena, 2013. urtean jaiotakoena zehazki.
Antxoko kirol elkartearen egituran zor historikoa izan da emakumeen taldeak izatearena. Gabezia horri aurre egiteko hautua egin du zuzendaritza berriak, eta testuinguru horretan ulertu behar da egin den deialdia. 2025-2026 sasoian bi taldeak berdegunean nahiko lituzkete zuri-gorriek.
