Gora Herriak!, Abya Yalatik Palestinara
Larunbatean bukatu zen Bixi-Bixiren Gorak Herriak! 2026eko ekitaldien erdigunean Palestina izango dela aurreratu zuten.
Larunbatean Meipiko karpan egindako ekitaldiko une bat.Bixi-Bixi elkartea Larunbatean bukatu zen Gora Herriak!-en zortzigarren ekitaldia. Egun osoko festa antolatu zuen Bixi-Bixi elkarteak. Aurten Abya Yalara bidaiatu dute sanjuandarrek eta ekitaldietan izan direnek; Abya Yala Amerikako jatorrizko herriek euren kontinentea izendatzeko darabilten izena da, eta haiei keinu egin diete kultur hamabostaldian. “Zoragarri joan ziren larunbateko ekitaldiak”, esan du Bixi-Bixiko kide Xabier Alegriak.
Goizeko kalejiran Ameriketako herrien indarra azaldu zuten, “askotan ahaztu egiten bazaigu ere zer lotura handia dituzten euskaldunon erroek, eta beste herri askoren sustraiek, adibidez, inauteri giroko antzekotasunetan”. Kalejiran, besteak beste, Uztaritzeko Ihauteriak eta Ekuadorko Diablada de Pillarokoek euren inauteriak irudikatu zituzten, antzekotasun nabarmenekin.
Bazkarian jan zutena ere oso baloratua izan zela jakinarazi du Alegriak, Ameriketako jakiak izan zituztelako dastagai besteak beste, “hango herrien memoria jaki bidez ekarri genuen”. Abeslariak, dantzariak, abeslariak… “Oso giro ederra izan zen”, ebatzi du. Gainera, bederatzigarren Gora Herriak!-en zein herriren gaineko lanketa egingo duten iragarri zuten Meipiko karpan egindako ekitaldian: Palestina. Hythem Abdulhaleem Euskal Herrian bizi den palestinarrak bi poema zati irakurri zituen, “palestinarrak ez direla inora joango esan zuen”, eta arabieraz esaldi bat errepikatu zuen, atera gure lurretatik. “Kanpora”. Palestinan hildakoen alde minutuko isilunea egin zuten.
Hamabostaldiaren balorazio oso baikorra egin du Alegriak. “Asko ikasi dugu”, esan du. Egitarauaren barruan izan diren hizlari eta sortzaile guztiek “asko ekarri” dutela jakinarazi du. Amalurrarekin lotura zein funtsezkoa den azaldu zuen Xinka komunitateko (Guatemala) emakume batek, Guatemalako Maia q’eqchi komunitatean hitzaldian (maiatzaren 29an) “Hark esan zigun goialdea eta behealdea, edo iragana eta etorkizuna ez direla linea bat. Zikloak direla. Etorkizuneko linea lurrarekiko loturan dago, pachamama-rekiko loturan dago, edo ez dago”. Jon Sarasuarekin egindako bertso saioa ere oso hunkigarria izan zela zaldu du Alegriak, “bere anai Aitor gogoan izan genuen”. Medellindik (Kolonbia) etorritako repentistaren saioa ere bikain joan zela azaldu du, Oskar Zuloaga Uriberena.
Palestina. Hura izango da 2026ko Gora Herriak!-en erdigunea. Elkarte sanjuandarreko kideak jada hasi dira urtebete barrukoa prestatzen.
Jarraian, larunbateko ekitaldien hainbat irudi Bixi-Bixik HITZAra bidalitakoak:
