Hibaikak eta Duintasunak elkarren eskutik egingo dute arraun
Bi traineru seniorrak aurkeztu ditu Hibaikak amabitxi izango duen Duintasuna Pentsiodunen elkartearen eskutik. Arraun klubaren harrobiak, zein haren bueltan ari diren laguntzaile guztiek leku berezia izan dute gaurko ekitaldian. Dozenaka Hibaikazale eta adin guztietako herritar bertaratu dira arraunlariei babesa erakustera.
Hibaikako arraunlariak Duintasunako kideekin gaurko aurkezpenean. Arraunean herria saretzen jarraitzen du Hibaika Arraun Elkarteak, konplizitateak josten. Egun berezia izan du gaurkoa. Izan ere, denboraldi honetan ariko diren Emakume eta Gizon seniorren taldeak aurkeztuko ditu Zumardian arraun elkarteak. Eta aurkezpena egitearekin batera herri egiten jarraitzen duela utzi du agerian, olatuak hartzen bezain temati dabilela eragileekin harilkatzen. Aurtengo amabitxia ere, berezia, baina batez ere, bere bi ontziak bezala, borrokalari nekaezin: Duintasuna Pentsiodunen mugimendua.
Arraunlariek egindako pasillotik barrena sartu dira Zumardira Duintasuna Pentsiodunen Elkarteko kideak, bildutakoen txalo artean.
Elkarren eskutik egin dute arraun gaur Duintasunak eta Hibaikak. Hunkituta eta eskertuta jaso du arraun elkartearen aitortza pentsiodunen elkarteak. Eskerrak eman dizkie Hibaikak bizi duinak bermatzeko egiten duten lanarengatik, eskuzabal, konprometitu eta helburuak argi. Hiru ezaugarri horietan bat egiten dutela biek jarri du nabarmen ekitaldian aurkezle lanetan aritu den Arrate Arozena Mujikak: “Duintasunez zabaldu duzue urte luze hauetan zuen aldarria, eskuzabal, herri osoaren bizi duinerako eskubidea erdian jarrita, pertsonak oinarrian jarrita eta orainetik abiatuta etorkizun hobeagoa duzue portu. Paladaz palada ari zarete hileko lehen astelehenero elkarrekin arraunean, sare sendoa josita olatuak hartzen, eta itsaskirrian zein itsaso zakarrean lemazain trebe zaretela jarri duzue agerian”.
Osasun eta zaintza sistema publiko unibertsala eta soldata zein pentsio duinak bermatzea, emakume eta gizonen pentsio arrakala ezabatu, edota zaurgarrienen bizi baldintzak duintzeko egiten duten lana aipatu du aurkezleak, “hori guztia, bizitzaren azken etapa duin eta beharrezkoak ditugun baliabideekin eman dezagun”.
Eredu eta erreferente bilakatu direla ere esan du Arozenak, “herria erdian jarrita, haren interesen, pertsonen alde ari zarete uneoro hamaika jatorri, pentsamendu eta izaera duzuen dozenaka pentsiodun; ezberdinen indarrak batuta ari zarete arraunean, badakizuelako elkarrekin arituta baino ezin dela aurrera egin”. Horretan bete-betean egiten duela Hibaika Arraun Elkarteak Duintasunarekin esan du eta azaldu ontzi bakoitzak hamaika jatorri eta izaera barnebiltzen dituela elkarrekin arraun egiteko, “txikitik ari da Hibaika, umiltasunetik, herria egiten egunero, Errenteria-Oreretaren izena kirolarekin, lanarekin eta konpromisoarekin lotuta, harrobitik hasi eta seniorretara”.
“Ohoretzat” jo du arraun elkarteak aurtengo denboraldia Duintasunaren eskutik egitea, “zuen gerizpean handitzen joatea, eta ziur izan, bizi ibilbideak eman dizuen eskarmentua gure egingo dugula. Herritik herriarentzat sortutako kluba gara eta herri egiten segi nahi dugu, zuek hileko lehen astelehenero egiten duzuen moduan. Duintasunak lehorretik, Hibaikak uretatik, egin dezagun herri elkarrekin”.
Hibaikaren oroigarria eman dio Jon Iriondo Hibaikako zuzendaritzako kideak Javier Sanz Duintasunaren ordezkariari bertaratutakoen txalo artean. Sanzek hartu du hitza ondoren, motzetik, pentsiodunen izenean, gaurko omenaldia borrokan jarraitzeko hauspoa dutela esan du eta eskerrak eman dizkie Hibaika arraun elkarteko kideei pentsiodunak aukeratu izangatik, “gora Hibaika eta Gora Duintasuna, eskerrik asko”.
Denboraldiko helburuak
Arraunlariak aurkezteko unea heldu da gero. Lehenik gizonak deitu ditu aurkezleak bana bana eta ontziaren inguruan jarri dira, Emakume Seniorren txanda heldu da gero eta haiek deitu ahala atera dira Zumardiaren bihotzera, ontzi ondora. Mendizabalek hartu du hitza ondoren aurtengo helburuak azaltzeko. Emakume Seniorren ontziak hirugarren urtea beteko duela Euskotren Ligan eta negu osoa egin dutela entrenatzen esan du Mendizabalek, “aurre denboraldian gaude orain, eta Gipuzkoako eta Euskadiko txapelketak jokatu ditugu, azken horretan domina etxera ekarri genuen—hirugarren sailkatu ziren—, negu gogor baten ondoren ligari hasiera emateko prest gaude. Espero dut ongi ibiltzea, gure maila ematea eta zalegoaren laguntzarekin gure helburuak lortzea”.
Duintasunari ere zuzendu zaio Mendizabal, “ea Pradalesek —Imanol— erantzuten dion eskutitzari, hitzordu bat jartzen duen gutxieneko pentsioen gaiaz hitz egiteko, eta zuen helburua lortzen duzuen”. Txaloekin erantzun diote Mendizabali bildutakoek.
Cobjucek berriz, eskerrak eman dizkio gidatzen duen arraunlari taldeari, “talde trinkoa egin dute eta hori eskertzekoa da”. eskerrak ere, aurreko denboraldian entrenatzailea izan zuten David Iglesias Albisuri ere, “oinarri nahiko sendoarekin utzi zuelako taldea”. denboraldian dituzten helburuei begira labur eta zehatz Cobjuc, “banderak irabaztea eta kategoria igotzea. %80 batean aukerak ikusten ditut maila igotzeko eta KAE1 Ligara pasatzeko. Arraunlariek eskatzen zaienari jaramon egiten badiote sinistuta nago igotzea dugula”.
Gazte Mailako arraunlariei ere aipamena gaurko ekitaldian; txaloka hartu dituzte bildutakoek Gazte mailako Emakumeak eta haien entrenatzaile Miguel Enriquez San Miguel eta erdira atera dira, seniorrekin batera, aurten denboraldi bikaina egin dutelako. Haien ostean, harrobiko gainontzeko arraunlariak. horiek ere lorpen aipagarriak izan dituzte bukatu berri duten denboraldian.
Ekitaldia bukatzeko txistorra pintxoak banatu dituzte bertaratutako guztien artean.
Hibaikako arraunlari seniorrak
Emakume Seniorrak
1- Ane Aiestaran Etxebeste
2- Sofia Boscarol Orive
3- Nerea Curto Velo (patroia)
4- Nerea Deobarro Corvo
5- June Galardi Zapirain
6- Amaiur Garcia Rincon
7- Maddi Insausti Intziarte
8- Maia Lasa Betelu
9- Eva Lopez Chafer
10- Aitana Marquina Garzon
11- June Mikeo Antequera
12- Itxaso Murcia Susenene
13- Amaiur Olaiz Ibarzabal
14- Nerea Orena Diaz
15- Usue Osa Bengoechea
16- Uxue Rodriguez Garcia
17- Elene Telletxea Yarzabal
18- Inge Ugarte Gartziandia (Patroia)
19- Nora Urbe Muxika
Entrenatzailea: Iñaki Mendizabal
Gizon Seniorrak
1- Oier Aierdi Gurpegui
2- Eneko Aramendia Bartolome
3- Itzurun Aristi Zarate
4- Aratz Bergara Kortadi
5- Nerea Curto Velo (patroia)
6- Javier Erro Martinez
7- Alejandro Fariña Roma
8- Adur Ferradas Aizpurua
9- Oier Gallastegi Rodriguez
10- Iraitz Lamana Lopez de Uralde
11- Edgar Leal Mendez
12- Aitor Legorburu Gomez
13- Anxo Murua Duran
14- Jose Antonio Pereira Da Silva Maia
15- Ander Plata Gomez
16- Ander Recondo Herrero (patroia)
17- Liher Saiz Zarate
18- Endika Sanz Martinez
19- Jordi Triadu Dominguez
20- Ander Urtasun Osacar
21- Ibai Vaquero Legara
Entrenatzailea: Dani Cobjuc
