Hibaikak gaur aurkeztuko ditu bi traineruak
Borroka loraldi betean ari eta eskubide sozialen erreferente ukaezin bilakatu den Duintasuna Pentsiodunen Elkartea izango da herriko arraunlarien amabitxi.
Hibaikako arraunlarien familia argazkia iazko aurkezpenean. Hibaika Arraun Elkarteak prest ditu eskifaiak denboraldiari hasiera emateko. Urtero moduan, aurten ere, seniorren emakume eta gizonen traineruen aurkezpena egingo du. Gaur izango da hori —hilaren12— Zumardian. Aurkezpen ekitaldia 19:00etan hasiko da eta gonbidatu bereziak izango dituzte. Izan ere, borroka loraldi betean ari eta eskubide sozialen erreferente ukaezin bilakatu den Duintasuna Pentsiodunen Elkartea izango da herriko arraunlarien amabitxi.
Hori horrela, pentsiodunen mugimendua omenduz hasiko dute gaurko aurkezpen ekitaldia. Aurretik, Maiana eta Egoitz trikitilariek girotuko dituzte Erdialdeko kaleak.
Emakumeen trainerua EuskoTren Ligan arituko da aurten, eta uztailaren 5ean hasiko dute denboraldia Bilboko Banderarekin. Hurrengo egunean, berriz, Sestaon ariko dira lehian. Gizonen trainerua, berriz, KAE2 Ligan lehiatuko da. Hilaren 21ean izango dute denboraldi barruko lehenengo estropada Astilleron. Hilaren 28an berriz, hitzordu bereziena izango dute, etxean jokatuko baitute, Oiartzun ibaia eta Pasaiako badiako uretan Errenteriako Hiria XII Bandera.
Gaurko aurkezpen ekitaldian Iñaki Mendizabal emakumeen entrenatzaileak eta Dani Cobjuc gizonen entrenatzaileak ere hartuko dute hitza, eta denboraldiko helburuak izango dituzte hizpide.
Familia argazkia eginda, bertaratzen diren guztientzat txistorra pintxoak izango dira.
Hibaika Arraun Elkarteak herritar guztiak deitu ditu bi traineruen aurkezpen ekitaldira gerturatzera, “gure arraunlariei babesa erakustera”.
Ondoko bideoa zabaldu du Hibaika Arraun Elkarteak gaurko agerraldiaren harira.
