Larunbatean irekiko dute udako igerilekua
Irailaren 14ra arte egongo da irekita igerilekua, baina, abuztuaren 3an itxita egongo da. 10:00 eta 21:00 artean egongo da irekita.
Oiartzungo Udalak jakinarazi duenez, larunbatean –hilak 14– irekiko dute udako igerilekua. Hiru hilabetez egongo da hura zabalik, zehazki, irailaren 14ra arte. Gainera, zehaztu dute goizeko hamarretatik gaueko bederatzietara egongo dela zabalik, baina, azpimarratu dute abuztuaren 3an itxita egongo dela.
Elorsoro kiroldegiko bazkideek bazkidetzan jasota dute udako igerileuaren zerbitzua; gainontzekoek, bonuak eta eguneko txartelak erosi beharko dituzte.
Helduen banakako bonuaren prezioa 105,75 eurokoa da, gazteena 70,54 eurokoa eta familiakoa 140,97 euro. Hala ere, azken horri dagokionean, zehaztu dute gurasobakarreko familiek edota familia ugarikoek 98,69 euro ordaindu beharko dituztela 140,97 euro beharrean. Era berean, 13.500 euroko diru sarrerak gainditzen ez dituzten familiek doan izango dute sarrera, baina kiroldegian bonua erostean egiaztatu beharko dute baldintza hori.
Eguneroko txartelaren kasuan, 5 eta 16 urte bitartekoek 4,60 euro ordaindu beharko dute, eta 16 urte edo gehiago dituztenek, aldiz, 9,05 euro.
Alabaina, sarrerak bosnaka erosteko aukera egongo dela nabarmendu dute: gazteenaren prezioa 18,15 eurokoa da, eta 36,05 eurokoa helduena.
