Liburutegiaz gozatzeko festa egingo dute asteburuan
Hiru parte hartze saioren ondoren, bukatutzat eman dute Ku-ku elkartekoek liburutegiaren eraldaketa prozesuaren lehen zatia, eta hori ospatzeko, festa izango dute asteburuan.
Eraldaketa prozesuko parte hartze saio bateko irudia.Allende Arnaiz Oiartzungo Udalak eta Ku-ku Haur eta Gazte Literatur Ekimenak Bazen behin liburutegi bat prozesua jarri zuten martxan liburutegi eredua modu kolektiboan birpentsatu eta diseinatzeko, eta asteburuan bidearen lehen zatia bukatu dutela ospatuko dute.
Liburutegian bertan izango da festaren zati handia, espazioaren terminoa etengabean mahai gainean egon denez, amaiera festa hori bertan ospatzea erabaki baitute. Karmele Mitxelenak eman du bi egunetako hitzorduen berri, eta zehaztu duenez, asteburuko plan modura planteatu dute; izan ere, bi jarduera elkartu dituzte astebururako: liburutegiko eraldaketa prozesuaren bukaera festa, eta Ku-ku Eguna.
Ku-ku Eguna, “normalean” maiatzean egiten dute, baina Mitxelenaren hitzetan, asteburu honetako egitarauan bazuen lekurik Ku-ku Egunak ere. “Oso uztargarriak ikusten genituen bi egunak eta bi festak”. Ku-ku elkarteak antolatzen du prozesuaren bukaera festa, eta elkarte hori izan da liburutegiaren prozesuaren eragile nagusietakoa. “Ku-ku Eguna ere liburuaren inguruko festa bat izaten da, herritarren beharrei erantzuteko beste liburutegi mota bat eraikitzeko egiten dugun zerbait da, eta, hortaz, prozesuari lotuta dago”.
Herria izan da ahotsa
Liburutegiaren itxura berria nolakoa izan behar zen herriak erabaki behar zuela sinistuta zeuden Ku-kukoak. “Uste dugu ez zuela eraldaketa hori ahots bakar batek erabaki behar. Hortaz, prozesu honetara jendea erakartzea izan da gure egitekoa”. Gauzak horrela, “denen ahotsetik” atera nahi zuten Ku-kukoek komunitateari erantzuteko azken emaitza izango zena. “Seinale txarra litzateke liburutegiaren prozesua egin eta gero emaitza izatea norbaiten ametsetako liburutegia, horrek suposatuko bailuke prozesua nahiko itxita izango litzatekeela”.
Beraz, planteatutako erronka ahalik eta jende gehienarekin hitz egitea zela ikusita, Mitxelenak uste du bete dutela, nahiz eta kasu batzuetan zaila izan den. “Batzuekin parte hartze handiagoa izan da, beste batzuekin sinbolikoagoa, baina uste dut aletxoa denek jarri dutela eta saio presentzialekin lortu ez duguna galdetegi bidez lortzen saiatu garela. Bide ezberdinetatik saiatu gara denengana iristen”, gehitu du.
Hiru saio presentzial egin dituzte, eta hitzordu horietara hogei eta hogeita lau pertsona artean elkartu dira. Alabaina, ezin zenbatu dezakete jendearen parte hartzea, askok kolektibo baten izenean hitz egin baitute. Hala ere, Mitxelenak argitu du saioetara joan diren pertsonez gain zuzenean jo dutela zaurgarriengana, erretiratuengana, ikastetxeetara, asanblada feministarena, Killirikupekoenengana…
Larunbat goizean Allende Arnaizek gidatuko duen estanpazio tailerrarekin hasiko dute eguna; liburutegiko kaperan izango da, eta poltsak estanpatuko badituzte ere, nahi duenak bere elastikoa eramateko aukera izango du.
Tailerraren ondotik, Elena Zalakainek liburutegiko kaperaren bisita gidatua egingo du. “Orain arte herritar askorentzat ezezaguna izan den espazio bat da, beraz, modu batean herriari espazio bat irekitzeko aukera emango dion hitzordua izango da”. Igandean, aldiz, kaleko liburutegia eta tailerrak izango dira 10:30ean hasita, eta ordu erdi geroago Maite Frankok ipuinak kontatuko dizkie hiru urtetik aurrerako haurrei. Azkenik, prozesuaren bukaera ekitaldiarekin batera, brindisa eta mokadutxoa egingo dituzte.
Prozesuaren eraldaketa prozesua bukaerara iritsi dela ospatuko dute asteburuan, baina jakin badakite oraindik lan asko dutela egiteko. Herritarren ahotsetatik atera den irudia aurkeztuko dute, baina kudeaketaren arloa oraindik “zintzilik” dago.
