Ondartxoko ontzientzako biltegia uztailerako bukatzea aurreikusten dute
Aizpea Otaegi alkate eta Leire Mazizior Kiroletako zinegotziak biltegiko lanak bisitatu dituzte gaur. Hiltegia birgaitzea ere aurreikusia dute, eta Hibaikaren jarduerarentzako eremu bat izateaz gain, kirol nautikoetarako gunea eta auzoarentzako espazio komunitario bat ere bilduko ditu.
Ondartxoko ontzientzako biltegia forma hartzen hasia da, eta bisita egiteko baliatu dute Aizpea Otaegi alkate eta Leire Mazizior Kiroletako zinegotziak. Eraikin berriak hiltegiko lanak egiten diren bitartean Hibaikak bere ontziak bertan jasotzea ahalbidetuko du, baina, lanen ostean ere Hibaikarentzat erabilgarri geldituko da 300 metro koadroko gunea.
Uztaila bukaerarako eraikuntza bukatzea aurreikusten dute, eta nahiz eta barruan oraindik azken lan batzuk egiteke geldituko diren, abuztutik aurrera Hibaika biltegia erabiltzen hasiko da. Guztira 450.000 euroko aurrekontua bideratu da proiektura.
Behin ontzientzako biltegia eraikita, hiltegiaren birgaitze lanekin hasten ahalko dira. Eraberritze proiektua “eguneratze” fasean dagoela adierazi du alkateak, eta lanen lizitazioa udazkenean hastea aurreikusten dute. Hiltegi berrian Hibaikak bere jarduera aurrera eramateko tokia izateaz gain, herri kirol nautikoetarako gune bat ere egongo da, baita auzotarrentzako espazio komunitario bat ere.
Oiartzun ibaia berreskuratzeko helburuarekin ekin diote proiektuari. Hibaika bertan egoteak ibaiari “bizitza” ematen dio, eta “biziberritzen laguntzen du”; baina, horrez harago, hiltegian prestatuko duten ur kiroletarako guneari esker kirolariek haien proiektu eta jarduerak garatzeko aukera izango dute.
