Lehen sektoreari bultzada eman nahi diote
Lehen sektoreko ekoizleak gero eta gutxiago nabarmentzen direla iritzita, Oiartzun Burujabek herriko bost etxaldetan praktikak egiteko aukera emango die Oiartzungo gazteei.
Traktore bat soro batean, lanean. Oiartzun Burujabe egitasmoko Elikadura Mahaiak herriko nekazari eta abeltzainekin ofizioa ikasteko auzolan praktika ordainduak antolatu ditu uda honetarako. Herriko bost etxaldetan egin ahal izango dituzte gazteek praktikak, uztailean, astelehenetik ostiralera.
“Ikusten dugu geroz eta gutxiago nabarmentzen direla lehenengo sektoreko ekoizleak, eta horri bultzada eman nahi genion”, azaldu du Ioana Iñiguez Elikadura Mahaiko kideak. Zehatzagoak izate aldera, herriko gazteek sektore hori barrutik eta lehen eskutik nola den ezagutzea nahi dute; baita, besteak beste, lan horiei balioa ematea ere.
Elikadura Mahaia, hala nola, Laborek, HemenGuk-ek, Behemendik eta Oiartzungo Udalak antolatzen dute, eta etorkizuneko erronkei aurre egitea da euren helburu nagusia.
Izen emateak, bide onetik
Gutxienez hamasei urte behar dira praktika horietan izena emateko, eta Iñiguez gustura dago izen emateek hartu duten bidearekin. “Momentuz oso erantzun ona ari da izaten egitasmoa. Bost etxaldetan lan egiteko aukera planteatu dugu, eta uste dut dagoeneko horiek bete direla”, nabarmendu du. Gauzak horrela, Elikadura Mahaikoak azpimarratu du “kontent” dagoela emaitzarekin izen ematea ireki den momentutik jendeak interesa erakutsi duelako.
Hala ere, asteazkenean (hilaren 25ean) itxiko da izen emate epea, eta jende asko aurkezten bada, hainbat irizpide kontuan hartuta egingo dute aukeraketa.
Auzolan praktiketan nekazaritzari eta abeltzaintzari lotutako lanak egin beharko dituzte, eta, oro har, nekazari eta abeltzainari “eguneroko bizitzan esku bat botatzea” izango da gazteen betebehar nagusia.
Azkenik, Elikadura Mahaikoak argi utzi nahi izan du proba pilotua dela egitasmoa, eta uda honetan ikusiko dutela zer nolako harrera izan duen, zer moduz moldatzen diren parte hartzaileak, abeltzainak, nekazariak… “Horren ondoren aterako ditugu ondorioak eta ikusiko dugu ea aurrerantzean horrelako zerbait martxan jarri daitekeen”.
