'Bidaia galduak', Orratx!-en zazpi istorio oholtzan
Larunbatean eta igandean herriko antzerki taldeak bere azken lanaren estreinaldia egingo du Gezala Auditoriumean.
“Zazpi emakumek beren baitako bidaiari helduko diote bizitzaren trenaren zain dauden bitartean, nor bere garaitik etorria. Zazpi istorio, zazpi izaera, egiten dutena egiteko hamaika arrazoi”. Orratx! Antzerki Taldeak Bidaia galduak lana estreinatuko du herrian asteburuan, hilaren 28ean eta 29an hain zuzen ere, Gezala Auditoriumean: bi emankizunak 19:30ean hasiko dira, eta sarrerak lotura hau baliatuta eros daitezke. Hasierako testua antzezlanaren sinopsiaren zati bat da. Oholtzan ikusiko dena askoz gehiago da. “Geltoki batean gaude aspalditik… ba al dago esperantzarik?”.
1998an sortutako antzerki taldekoek emakumeen gaineko tiraniak aldatu ote diren erantzuteko baliatu nahi dute Bidaia galduak, denboran zeharreko bidaia baten bitartez. Bide horren protagonista zazpi aktore dira, bakoitza garai batetik etorria. “Denboran zeharreko bidaia honetan, aldatu ote dira emakumeen gaineko tiraniak, emakumeen manerak, emakumeen biziraupena?”, galdetu dute taldeko kideek.
Galdera horiei erantzuna, larunbatean eta igandean Gezalan. Aurrerago Euskal Herriko hainbat bazterretan zabalduko dute euren sorkuntza lezoarrek. Adibidez, hilaren 20an Donibanen egin zuten emankizuna, Pasaia Km0 jaialdiaren barruan.
Orratx!-en 'Bidaia galduak'. Fitxa.
- Aktoreak: Joseba Salaberria, Edurne Agirrezabala, Nagore Perez, Jurgi Sarasola, Begoña Azpiazu, Nahikari Gaztelumendi eta Leire Agirre.
- Zuzendaria: Lierni Fresnedo.
- Musikaria: Jorge Morella.
- Espazio eszenikoa: Joxean Intziarte eta Txema Rivera.
- Argiztapena: Txema Rivera.
- Soinua: Txema Rivera, Amaia Legorburu eta Amaia Herrero.
- Jantziak: Orratx!.
- Itzulpena: Orratx!.
- Laguntza berezia: Aratz Ziganda eta Araitz Larrea.
- Kudeaketa: Mertxe Larrea.
