"Esperientziak erakusten digu partida zailak izango direla"
Bihar –hilak 28– Eskuzko Gipuzkoako Herriarteko txapelketako finala jokatuko du Oiartzunek Hernaniren aurka. 10:30ean izango dira partidak.
2024ko Herriarteko txapelketako irudia. Beste urtebetez, oiartzuarrek finaleko urduritasuna sentituko dute bihar. Eskuzko Gipuzkoako Herriarteko txapelketako finala jokatuko dute Donostian, eta txapela jantzi edo ez erabakiko duten partidetarako ordu batzuk geratzen diren honetan, Asier Retegi Oiarpeko entrenatzaile eta hautatzaileak HITZArekin hitz egin du.
“Bosgarren urtea da finalera heltzen garela, hortaz, sentitu ditugu bizipen hauek lehenago ere. Esperientzia horrek erakusten digu partida zailak izango direla, finalak beti lehiatuak eta konplikatuak izaten baitira”, izan dira Retegiren lehen hitzak.
Kontzentratuta eta dena emateko prest dira pilotariak, baina jakitun dira finalera heltzea konplikatua dela eta ez dela urtero gertatuko. Horren aurrean, alabaina, entrenatzaileak kontatu du “gogo eta ilusio handiarekin” daudela, eta “ongi aterako denaren esperantza” ere badutela.
“Hiru bikote on” bezala definitu ditu Retegik aurkariak, eta gehitu hiru partida “nahiko gogor” izatea aurreikusten dutela. Txapela janzteko hiru partidetatik bi irabazi behar dituzte. Entrenatzailearen iritziz, “izan liteke kadete mailako partida beren alde egotea, baina gure pilotariak ondo prestatuta daude eta partida hori irabazteko esperantzak ditugu”, jarraitu du. Jubenilen eta nagusien mailan, berriz, konfiantza osoa du. “Ea ondo ateratzen diren”. Nabarmendu du, bestalde, lehenengoz jokatuko dutela Herriarteko final bat Hernaniren aurka.
Ez dute lan makala egin oiartzuarrek; emaitzak dira lanaren ondorio, eta gakoa zein den galdetuta, entrenatzaileak dio urtero jakin dutela atzetik heltzen diren jokalariei jarraipena ematen. “Urtero kategoria bat berritzen da kadeteetan, eta gazte horiek jarraipena ematen ari dira, eta gauzak ondo ari dira ateratzen”.
Donostiako Atano III pilotalekuan jokatuko dutena bosgarren finala izango da oiartzuarrentzat, eta badu horren aurrean zer esana Retegik. “Bosgarrena izanik badirudi normala dela finalera iristea, baina ez da normala; asko kostatzen da, eta hau ez da urtero gertatuko. Balio pixka bat eman behar zaio gertaera horri eta jendeak pentsatu egin behar du horretan. Ematen du bosgarren finala segidan izaik ez dela euforiarik sumatzen, baina guk kontrakoa nahi dugu, jende asko animatzera joatea, alegia”.
Hauek dira Oiartzungo taldea osatzen duten pilotariak: Haitz Aranburu Mutiloa, Amaiur Artetxe Garmendia, Oier Bergara Zeberio, Oihan Etxeberria Iparragirre, Aitor Etxeberria Juaristi, Oihan Etxepare Odriozola, Aitzol Galardi Makazaga, Ekhi Iradi Beloki, Unax Landa De Marcos, Axel Lasa Gelbentzu, Mikel Leonet Arotzena, Ekain Mitxelena Olague, Unax Oiartzabal Goia, Manex Olaiz Etxeberria, Xabat Olaiz Etxeberria, Alain Olaizola Agirre, Beñat Ormaetxea Romero, Alex Otegi Mayoz, Harkaitz Ubiria Perez, Oier Zabaleta Ibarra, Eneko Zalakain Deskarga eta Unai Zelaiaran Orbegozo.
Bihar –hilak 28– 10:30ean izango dira partidak, eta ETB1en zein YouTuben hitzordua jarraitzeko aukera izango da. Hara joan nahi duenak, haatik, pilotalekuan bertan izango du bihar sarrera erosteko aukera.
