Hazten jarraitzeko bi aukera 'Batelerak' eta 'Libia' traineruentzat
ETE eta KAE1 ligetako bi estropada izango dira jokoan asteburuan Donibane Lohizunen eta Portugaleten.
Hazten jarraitu, sendotzeko. Sendotzerakoan, helburuen bila joan. Asteburu honetan bi estropada jokatuko dituzte ETE nahiz KAE1 ligetan. Bertako ordezkari pasaitarrak San Juango Batelerak trainerua eta San Pedroko Libia izango dira hurrenez hurren. Joan den asteburuan liga horietako lehen bi lehiak jokatu ziren, eta estreinako horietan ikasitakoaren ondorioak uretan erakutsi nahi dituzte arrosek eta moreek. Donibane Lohizunen (Lapurdi) eta Portugaleten (Bizkaia) jokatuko dira larunbat eta igandeko estropadak.
San Juango emakumeen ontziak maila oso altua azaldu zuen joan den astean Astilleron eta badian egindako estropadetan, bietan, bigarren izan ziren, eta etxekoa ia-ia irabazi zuten. Zarautz izan zuten bietan aurretik, eta antza, hura izango dute arrosek sasoiko erreferentzia nagusi, joan den astebukaerako lehietan hirugarren izan ziren traineruak sanjuandarrengandik urrun samar gelditu zirelako. Euskotren Ligarako igoera play-offerako bi ontzi sailkatuko dira ETEtik, eta bihar eta etziko emaitzak errepikatu edo hobetzen badira, bi postu horietan zeharo egonkortuko dira Batelerak.
San Pedrok bi aurpegi azaldu zituen joan den asteburuko estropadetan. Astilleron ustekabeko 9. postua lortu zuten; igandean, etxekoan, traineru oso lehiakorra dutela azaldu zuten moreek laugarren izanez. Igandeko bideari eutsi behar dio Libia-k kategoria berriari neurria hartu, eta gora begira jartzen hasteko.
Bihar, ETE Ligako Donibane Lohizune Ziburuko Bandera 16:30ean hasiko da, eta KAE1ekoa 17:30ean. Igandean, berriz, 11:45ean hasiko da ETEko Portugaleteko Bandera, eta 12:35ean KAE1ekoa. Gainera, KAE2ko asteburuko bandera Errenteria-Oreretan jokatuko da, biharko (larunbata) 17:30ean hasita, Hibaikak antolatua.
