"Gure gizartea eta bereziki gure herria bidezkoagoa izan dadin lan egingo dugu"
Lezoko Udaleko talde politiko guztiek adierazpen bateratua egin dute LGBTIQ+ harrotasunaren egunaren harira.
LGBTIQ+ harrotasunaren eguna da gaur, hilak 28, eta horren harira, Lezoko Udaleko talde politiko guztiek adierazpen bateratua zabaldu dute “harro gaudelako gure bizitzez, harro gure bizi historiaz, harro LGBT+ mugimenduaz”.
“Komunikabide nagusienen estigmatizazio saiakerek eta manipulazioak zein eskuin muturreko diskurtsoek cis-hetero arautik ateratzen diren bizitzak ezabatu nahi dituen honetan, inoiz baino garrantzitsuagoa da nondik gatozen ospatzea eta aldarrikatzea. Stonewalletik Euskal Herrira, milaka bizipen, galera, aldarrikapen eta lorpen izan ditugu, baina oraindik egiteko asko dago. Eraso LGBTIQ+fobikoen datuak gora doaz, armairuak presente jarraitzen du gure bizitzako arlo guztietan, diskurtso patologizatzaileak ugaritzen ari dira… eta ondorioz, gure bizitzak arriskuan daude”, dio adierazpenaren hasierak.
Egoera horren aurrean, antolatzearen eta borrokatzearen garrantzia nabarmendu nahi izan dituzte. “Gure kasuan, instituzioetatik politika publiko integral eta sendoak, perspektiba feministan oinarritutako zerbitzuak, babes kolektiborako edota autodefentsarako mekanismoak ezartzeko bideak ezartzea ezinbestekoa dugu”.
Eta, ildo horretatik jarraituz, nabarmendu dute anekdotikoak diren politikak alde batera utzi, eta estrukturalak diren horiek erdigunean jartzeko garaia dela. “Horretan ari gara hainbat udaletan, eta hori sustatuko dugu”.
Gauzak horrela, argi utzi nahi izan dute Lezoko Udalean konpromisoa hartzen dutela LGBTIQ+ komunitatearen borrokarekin bat egiteko, bai eta edozein prozesutan herriko erreferenteen aktibazioa sustatzeko konpromisoa hartu eta herritar guztiekin babesteko ere. “Gure gizartea eta bereziki gure herria bidezkoagoa eta inklusiboagoa izan dadin lan egingo dugu, borroka hau guztion erantzukizuna baita”, jarraitu dute.
Azkenik, udaletik dei egin dute gaurko egunaren bueltan antolatu diren ekimen eta mobilizazioetan parte hartzeko.
Finean, horrela amaitu dute adierazpena: “LGBTIQ+ pertsonen bizitzak egunerokotasunean bizigarriak izateko lan egiten eta borrokatzen ari diren kide guztiei eskerrak eman nahi dizkiegu eta guztiak zoriondu nahi ditugu, harrotzeko moduko mugimendua osatzen dugulako. Gure bizitzek balio dutelako, gora ekainaren 28a!”.
