Udako ordutegia izango dute Oarsoaldeko turismo bulegoek
Bost guneetan informazio pertsonalizatua jasotzeaz gain, eskualdeko zenbait ekintzetako erreserbak egiteko aukera izango dute bisitariek.
Oarsoaldea garapen agentziak jakitera eman duenez, uda garaian ere Oarsoaldeko informazio puntuak zein turismo bulegoak irekita egongo dira.
Errenteriako eta Pasaiako bulegoak urte guztian egoten dira zabalik, eta uda garaian ez da gutxiagorako izango. Are, ordutegi zabalgoa izango dute abuztuaren 31ra arte; zehazki, 9:30etik 14:30era eta 15:30etik 18:30era egongo dira zabalik, egunero.
Horretaz gain, urriaren 12ra arte irekita egongo da San Marko Gotorlekua, asteazkenetik igandera, honako ordu tarteetan: 10:00etatik 14:00etara eta 16:00etatik 18:00etara. Jakinarazi dutenez, jaiegunetan eta zubietan ere irekita egongo da, eta berau irekita dagoen guztietan izango dute bisitariek bisita gidatua doan egiteko aukera.
Era berean, Listorreta-Barrengoloiako informazio bulegoa ere zabalik dago, eta hura ere urriaren 12ra arte egongo da zabalik. Ostegunetan 8:30etik 14:00etara eta ostiral, larunbat, igande zein jaiegunetan 8:30etik 14:00etara eta 15:00etatik 18:30era egongo da zabalik.
Oiartzungo turismo bulegoari dagokionean, aldiz, uztailaren 1etik abuztuaren 31ra egongo da irekita. Arizmendi Enea etxe museoko beheko solairuan ematen du zerbitzua, egunero, 9:30etik 14:30era eta 15:30etik 18:30era. Bestalde, hala nahi duenak, XVII. mendeko eraikinaren historia ezagutzeko bisitak doan eskainiko dituzte ostiraletan 11:00etan (euskaraz, gaztelaniaz edota frantsesez), eta larunbat zein igandeetan 10:00etan eta 12:00etan (euskaraz), eta 11:00etan eta 13:00etan (gaztelaniaz).
Kasu horretan erreserba aurrez egitea beharrezkoa da 943 50 89 13 telefonora deituta edo mezu bat bidalita.
