Errenteriako ibaietara botatako 0,6 tona hondakin garbitu dituzte
Bost eguneko garbiketa kanpaina egin dute udalak eta Behemendi Landa Garapenerako Elkarteak elkarlanean.
Ibai eta erreken garbiketan 600 kilo hondakin garbitu dituzte.Herri Bizia Oiartzun ibaia, eta Tolarieta, Masti, Lintzirin, eta Epentza erreketatik 0,6 tona hondakin atera ditu brigada batek bost eguneko garbiketa kanpainaren barruan. Errenteriako Udalak eta Behemendi Landa Garapenerako Elkarteak elkarlanean antolatu dute aurten ere kanpaina hori. Naturgune horietatik 600 kilo hondakin bildu dituzte, tartean, plastiko ugari.
Oiartzun ibaiari dagokionean, Oiartzungo muga eta Santa Klara plazaren arteko zatia garbitu du brigadak; Lintziringo erretena Lartzabal auzotik hasita Oiartzungo mugaraino hartzen duen zatia barne. Landa eremuan, Tolarieta, Masti eta Epentza ubideak garbitu dituzte: Tolarieta baserritik Masti-Loidi industrialdera bitarte; Loidi baserritik Pontika auzora; eta Perurenatik Txikierdira. Ibaien ezpondak edo ertzak garbitzearekin batera, inguruetako espaloiak eta erreka ondoko eremuak ere garbitu ditu lanean aritu den brigadak.
Garbiketa kanpainak hiritarrek hondakinen kudeaketak duen garrantziaz eta norberaren jokaeraren ardura kolektiboa nahiz indibidualaz sentsibilizatzea duela helburu azaldu dute arduradunek, “hondakinak jatorrian egoki bereizi eta birziklatzen ez baditugu, agian gure ibaietako ubideetan agertuko dira eta horiek kaltetu eta kutsatuko dituzte, baita hondakinak Kantauri itsasoraino iritsi ere”.
Hondakin horiek desegiten diren neurrian, ekosistemarako eta flora eta fauna basatietarako kaltegarriak diren konposatu kimikoak jaregin eta kutsadura fokuak sortzen dituztela nabarmendu dute, ubideetan eta hondoetan eraginez, “plastikoaren kasuan arrain eta hegaztiak bertan bildu daitezke, edo irentsi dezakete eta azkenean fauna desagerrarazi ere egin dezake”.
Azken asteetako garbiketa kanpainaren barruan tamaina handiko zaborraren kopurua txikiagoa izan dela zehaztu du udalak, aurreko garbiketekin alderatuta, “ohikoak ziren erosketa orga, pneumatiko eta horiak desagertu egin dira ibai eta erreketatik. Azken urteetan egindako garbiketek eta jendartearen kontzientziazioak ibai eta erreken egoera hobetu duela esan daiteke”.
