Pasaiako eta Baionako portuak, bide beretik
Baionako Portu Sozietateko ordezkaritza batek Pasaiako portua bisitatu du. Bi erakundeek lankidetza estrategiko bat abiatu dute.
Baionako Portu Sozietateko ordezkaritza batek, Pascal Marty presidentea buru, Pasaiako portua bisitatu du, bertako instalazioak ezagutzeko eta lankidetza bideak identifikatzeko. Horiek Memorandum of Understanding batean jasoko direla adierazi du Pasaiako Portu Agintaritzak (PPA), bi portuen arteko lankidetza estrategiko bat abiatzeko.
Pasaiako eta Baionako portuek antzekotasunak dituztela baietsi du PPAk: industrialak dira, mugatik gertu daude, trenbide sarearekin daude lotuta eta Garraioaren Sare Tanseuroparreko Atlantikoko ardatzean kokatuta daude, Euroeskualdearen erdigunean. Elementu komun horiek mugaz gaindiko logistika indartzera eta eskualde industrien konektibitatea hobetzera bideratutako lankidetza ahalbidetzen dutela nabarmendu du PPAk.
Bi portuek erronka partekatuak dituzte, eta bi erakundeetako erabakiguneen oniritzia jaso ondoren, akordioak datozen urteetarako honako jarduera ildoak jasoko dituela zehaztu du PPAk:
- Itsas eta tren bidezko garraioa sustatzea, garraio iraunkor gisa.
- Bezeroentzako logistika efizientzia areagotzea.
- Bi portuetako esperientziak partekatzea ingurumen inpaktua murrizteko.
Akordioak, gainera, berrikuntza, digitalizazioa, teknologia garbien garapena eta itsas energia berriztagarrien sustapena ere lehenesten dituela azaldu du PPAk, kostalde atlantikoan zehar.
Bi portuen arabera, lankidetza abiatzearen helburua da bi erakundeak erreferente europar gisa kokatzea itsas garraio iraunkorrean, Europako hego mendebaldeko kate logistikoak optimizatzen, karbono aztarna murrizten eta nazioarteko proiekzioa zabaltzen lagunduz.
Pasaian, lehen urratsa
Bisita Izaskun Goñi PPAko presidenteak eta David Candelario PPAko zuzendariak gidatu zuten, eta hainbat azpiegitura ezagutarazi zituzten: kaia, biltegiak, arrain enkantea edota Kimua eta AZTI zentro zientifiko teknologikoak. Bisita bukatzeko, Memorandum of Understanding dokumentua prestatu zuten, eta bi portuetako kontseiluen oniritziaren zain gelditu da.
“Akordio honi esker, proiektu komunak bultzatu eta Atlantikoko Korridoreko portu industrial eta iraunkor gisa gure rola indartu ahal izango dugu”, nabarmendu zuen Izaskun Goñik. “Bi portuen gertutasunak eta transnazionaltasun handiak aukera bikaina eskaintzen dute esperientziak partekatzeko eta portu berritzaile eta iraunkorren lankidetza laborategi bihurtzeko”, gaineratu zuen Pascal Martyk.
Abiatutako akordioarekin, Pasaiako eta Baionako portuek etorkizun industrial, konektatu eta jasangarriago bat eraikitzeko beren konpromisoa berretsi dutela nabarmendu dute.
