Escalerillaseko epaiketaren inguruko balorazioa egin du PPAk
Astelehenean Escalerillaseko familien aurkako epaiketa egin zen Donostiako auzitegian. PPAk epaiaren balorazioa egin du.
default Astelehenean Escalerillaseko familien aurkako epaiketa egin zen Donostiako auzitegian. Pasaiako Portu Agintaritzak (PPA) epaiaren “balorazio positiboa” egin du. PPAk adierazi du prozeduraren oinarrian Eusko Trenbide Sareak (ETS) Pasaiako porturako zabalera metrikoko sarbidea antolatzeko abian duen proiektua dagoela. Proiektu hori 2023ko urriaren 5ean onartu zela baietsi du PPAk, 5,5 milioi euroko aurrekontuarekin, eta 12 etxebizitzari eragiten diela gaineratu du.
Etxebizitza guztiak PPAren jabetzakoak direla esan du portu agintaritzak: “Portuko langileei esleitu zitzaizkien jatorrian, mantentze zerbitzuetakoei zehazkiago esanda, eta horiek guztiek dagozkien errentamendu kontratuak sinatu zituzten, baina hauen indarraldia erabat lotuta zegoen langileak portuko batzordearen plantillan zerbitzu aktiboan jarraitzearekin, betiere portuak eremu hori portu zerbitzuetarako behar izatearen baldintzapean”.
Egun, kontratuaren baldintzak soilik bost bizilagunek betetzen dituztela adierazi du PPAk. Azpiegitura berrirako espazioa askatzeko “premia” zutenez, PPAk eta ETSk bizilagunei horren guztiaren berri eman eta elkarrizketak hasi zituztela esan du PPAk, “husteko prozedura adosteko”.
“Gaur ezagututako epaiak kontraturik gabeko zazpi bizilagun etxetik ateratzeko PPAren demandari dagokio, izan ere, etxebizitza erabiltzeko eskubidea zuten pertsonak hil ondoren, horien senideek etxeak erabiltzen jarraitu dute, baina kontratua luzatzeko eskubiderik gabe”, esan du PPAk.
Portu agintaritzak adierazi du alderdi guztiekin bildu dela eta “modu aktiboan” elkarlanean aritu dela etxebizitza horietako “bizilagun guztientzako konponbideak lortzeko”. PPAk esan du presidenteak hiru data proposatu zituela ekainean bizilagunekin biltzeko, “inongo erantzunik jaso gabe”. Ildo horretan, prozedura judiziala hasi baino lehen, zazpi bizilagunetatik birekin akordioak lortu zituela baietsi du PPAk.
Bizilagun horiei egindako proposamen prozesuaren barruan, PPAk esan du bitartekari lana egin duela Etxebizitza Ordezkaritzaren eta Pasaiako Udalaren aurrean, “bizilagunentzako bizitegi konponbideak antolatzeko”. Prozesu horretan, bizilagunek bitartekaritza aukera horri “uko egin” diotela zehaztu du PPAk.
Titulua duten bizilagunak
Titulua duten bost bizilagunen kasuan, 2024 urtearen hasieran, PPAk ETSrekin aurrez adostu zizkien baldintzak eskaini zizkiela azaldu du portu agintaritzak, “bizilagun horiei inguruan antzeko etxebizitza bat alokatzearen kostuari aurre egiten lagunduko dieten adinaren araberako kalte ordainak emateko.
Bost bizilagun horietatik, bik kalte ordain ekonomikoa onartu zutela adierazi du PPAk, eta beste hiruek uko egin zutela esan du. Hiru bizilagun horien “ezezkoaren” aurrean, Donibanen beste bizileku bat eskaini zaiela nabarmendu du portu agintaritzak, PPAren jabetzeko etxebizitzetan, “baina proposamen hau ere atzera bota dute”. Epaiarekin, PPAk bizilagun horiekin akordio batera iristea espero duela adierazi du.
