Gatazkari, elkarrizketa
Udalaren bitartekaritza eta Bizikidetza Zerbitzua sendotu egin dute; joan den urteko irailetik aurtengo otsailera 48 esku hartze egin ditu.
Gatazkari, elkarrizketarekin erantzuten dio udalaren Bitartekaritza eta Bizikidetza Zerbitzuak. Joan den urteko urritik, aurtengo otsailera arteko zerbitzuaren balantzea egin du udalak, eta asebete azaldu da, izan ere, epe horretan 40 esku hartze eskaera kudeatu zituen zerbitzuak, “astean bi eta hiru kasu arteko eskaera egonkorra izan da. Horien arteko %58 itxi egin dituzte, %22 zabalik dago, eta %19 kasuren jarraipena egiten ari dira”.
Gatazkarik ohikoenak, zaratarekin, espazio komunen erabilerarekin, irain eta mehatxuekin, etxebizitzaren narriadurarekin, animaliekin izandako arazoekin, eta familia bizikidetzarekin lotutakoak izan dira. Nabarmen jarri dute gatazkaren erditik gora (%54) fase goiztiar batean lantzen dutela: “Horrek gatazkak konpontzen laguntzen du, eta kroniko bihurtzea saihestu”, azaldu dute.
Udalaren balorazioa positiboa, eta erabiltzaileena ere bide beretik: 5etik 4,5eko puntuazioarekin baloratu dute eta %92k gomendatu du. Zerbitzura jo dutenen adin tarteari erreparatuta 46 eta 75 urte bitarteko adin tartea da nagusi.
Ohiko ordutegia aldatuko duela zerbitzuak jakinarazi dute, bestalde. Hori horrela, hilaren 8an, 15ean eta 29an, arreta 08:30etik 15:00etara izango da. Hilaren 22an eta abuztuan ez da aurrez aurreko arretarik eskainiko, eta zerbitzua irailaren 2an izango da martxan berriz ere, 08:30tik 15:00etara, eta irailaren 9tik aurrera ohiko ordutegira itzuliko da, 12:00etatik 19:00etara. Aurrez aurreko arretarik gabeko tartean, telefono eta posta elektronikoko kanaletatik emango dute zerbitzua, premiazko kontsultak egiteko.
Zerbitzua Errenteria-Oreretan bizi edo lan egiten duten pertsona guztien eskura dago.
