Gaintxurizketako behin-behineko pasabidea, erabiltzeko prest
Euskotrenen geltokiaren pareko irisgarritasun azpiegitura guztiz egina dago. Perrenerako bidea ere egokitu du udalak.
Jada guztiz eraikita dago behin-behineko pasabidea.Lezoko Udala Gaintxurizketako bizilagunek eta inguruko enpresetan lan egiten dutenek Gi-636 errepidea seguru gaindituko dute. Izan ere, Euskotren geltokiaren parean jada egina eta erabilgarri dago behin-behineko pasabidea, errepidearen bi aldeak batzen dituena urrutira joan beharrik gabe. Gainera, hara iristeko bidea ere eginda dagoela jakinarazi du Lezoko Udalak.
Pasabidea, Perreneko bidetik ikusia. Argazkia: Lezoko Udala.
Aldundiak egin ditu pasabidea egiteko lanak, 348.000 euroko aurrekontuarekin. Hamalau metro luze ditu pasarelak, eta lurretik 5,5 metrora altxata dago. Bi aldeetan eskailerak ditu. Hara iritsi, edo handik auzora joan edota inguruko enpresetara iristeko bidea ere egina dago, zehazki Errekalde hotelaren eta Gure Txokoa etxebizitzaren sarreraren artean oinezkoentzat ibilbidea egin da, Irunerako bidean zen erreietako bat kenduz. Udalak, bere aldetik, zati horretatik Perrene auzora doan bidea moldatu du: bide inguruko sastrakak kendu eta garbitu ditu, bai eta hondeaketa egin ere. Argi-puntuak karri bai eta esku-baranda ere instalatu ditu beharrezko eremuetan. Azkenik, lurrak egokitu eta gainean hormigoizko zolata jarri du. 117.000 euro erabili ditu udalak zeregin horietarako.
Horrez guztiaz gainera, pasabidearen ondoan bi autobus publiko geltoki berri jarriko direla esan zuten Gipuzkoako Foru Aldundiak eta Lezoko Udalak
Behin-behineko pasabidea eginda, hango bizilagun eta langileen aspaldiko eskaera bati uneko erantzuna eman zaio, behin betiko pasabidearen zain.
Perrenerako bide berria. Argazkia: Lezoko Udala.
