Albaolak itsas zeharkaldia egingo du Juanita Larando patatxan
Albaolako kideak hilaren 17tik 20ra bitartean egingo den Galiziako ontzi tradizionalen topaketan izango dira. Bertara itsasoz iritsiko dira.
Hasi da 2026ko Pasaia Itsas Festibalerako atzerako kontaketa. Pasaiako badiaren bueltan antolatzen den jaialdiaren laugarren ekitaldia datorren urteko maiatzaren 14tik 17ra bitartean izango da, eta herritarrek zein bisitariek itsas kulturaz, ondareaz, musikaz, gastronomiaz eta artisautzaz gozatzeko aukera izango dute.
2026ko festibala iritsi bitartean, Albaola Galiziako ontzi tradizionalen topaketan izango da, hilaren 17tik 20ra bitartean. Topaketa A Coruñako Ribeira herrian egingo da, eta Albaolako kideak patatxan nabigatuz joango dira bertara, Pasaia Itsas Festibala ezagutarazteko. Galizian ontzigintza tradizionalarekin lortutako lanbideak erakutsiko dituzte Albaolakoek, esaterako, txirrikagintza eta sokagintza.
Aurreko ekitaldietan bezala, Albaolaren ordezkari batzuk itsasoz iritsiko dira Ribeirara: itsas zeharkaldia egingo dute Juanita Larando patatxan, 2023an Sada aldera egin zuten bezala. Ontzi horretan 400 itsas milia inguru osatuko dituzte Kantauri itsasoan zehar.
Albaolakoek osatuko duten zeharkaldiak Itsas Kulturaren Ermandadea du izena, eta geldialdiak egingo dituzte portu esanguratsuetan. Pasaia Itsas Festibala ezagutarazteaz gain, Albaolakoek bisitak egingo dituzte patatxaren barruan. Lehenengo geldialdia atzo egin zuten, Getarian. Hortik aurrera, Portugaleten, Santanderren, Gijonen, Cormen, Ribeiran eta A Coruñan ere geldituko dira. Itsas zeharkaldia “berezia” dela esan dute Albaolakoek, haizeak mugiaraziko baitu ontzia eta klimatologiaren menpe egongo baita. Hori dela eta, ez dute eskala bakoitzeko data zehaztu.
Galiziako topaketa bi urtean behin antolatzen da, eta itsas kultura tradizionalaren nazioarteko erreferente bihurtu dela adierazi du Albaolak. 2001etik, Albaolak edizio guztietan hartu du parte, eta harreman estua eraiki du Culturmar erakundearekin eta Europako beste itsas erkidego batzuekin.
Galiziako festibala Culturmar Galiziako Itsas eta Ibai Kulturaren Federazioak antolatu du. Topaketa horrek Galiziako, Portugalgo, Irlandako, Euskal Herriko, Kataluniako edota Balear Uharteetako ontzi eta proiektuak biltzen dituela jakinarazi du Albaolak.
Juanita Larando patatxa
Juanita Larando patatxa XVIII. mendeko ontzi kortsario bat da. Iraganean, patatxak kostaldeko merkataritza ontziak ziren, eta Albaolak baietsi du oso aproposak zirela Atlantikoko itsasertzetatik nabigatzeko. Mendeetan zehar kabotajerako erabili ziren patatxak, portu batetik bestera mugitzeko. Horixe da, hain zuzen, Albaolakoek egingo dutena, portuz portu joango baitira patatxa horretan.
Ontzi mota hori bigarren mailako portu askotan euskarri teknologiko garrantzitsua izan zela jakinarazi du Albaolak, merkataritza eta portu jarduerak egiten zituelako. Albaolak nabarmendu du patatxak desagertuta egon direla euskal kostaldeetan, haiek erreplika bat eraiki zuten arte. Erreplika hori 2021eko ekainean uretaratu zuten, Pasaiako badian.
