Donibaneko gazteek kukaña antolatu dute santioetan
Eskubidean planaren baitan, gazteek herrirako dituzten proposamenak egiten dituzte. Horren baitan, kukaña egingo dute Donibaneko festetan. Hilaren 28an izango da, 16:30ean, Santiago plazan.
Donibaneko santioak gainean dira, eta barrutiko Jai Batzordea buru-belarri ari da lanean aurtengo festak antolatzeko. Jardueren artean, herriko gazteek kukaña antolatu dute, bigarrenez. Hilaren 28an izango da, Santiago plazan, 16:30etik aurrera.
Pasaiako Udalak haur eta nerabeen eskubideak bermatzea helburu duen plan bat du abian, eta bere asmoa da gazteenen partaidetza bultzatzea. Adingabeak subjektu politiko bihurtu, Pasaiaren garapenean txertatu eta herrirako dituzten proposamen eta iritziak aintzat hartzeko elkarlanean ari dira haur eta gazteekin lan egiten duten eragileak.
Bide horretan, Pasaiako haur eta nerabeen parte hartzea sustatzeko, herriko ikastetxeetan dauden elkarguneetan gai ezberdinak proposatu eta landu dituzte gazteek ikasturtean zehar. Jorratutako gaien artean, herriko festak daudela baietsi du udalak, eta gazteek gustuko dituzten ekintzak proposatu eta antolatu dituzte azken hilabeteetan. Udalaren xedea da festetan gazteei ahotsa eta hitza ematea, eta herria hobetzeko proposamenak landu dituzte. Kukañaren antolaketa proposamen horietako bat izan da.
Donibaneko Jai Batzordean gazteek beren espazioa izan dute aurten. Barrutiko gazteenek beren egitaraua aurkeztu eta bertan parte hartu dutela adierazi du udalak. Batzordean biltzen diren eragileak zein diren ikusi eta funtzionamendua ezagutu dute.
Kukañaren xehetasunak
Hilaren 28ko kukañan 12 urtetik gorako gazteek parte hartu ahal izango dute. Partaideek istripu asegurua behar dutenez, aseguru hori egin ahal izateko, izen emateak helbide elektroniko bidez egin behar dira, izen-abizenak, NAN zenbakia, jaiotze data, herria, telefono zenbakia eta helbide elektronikoa bidaliz. Hilaren 22a da izena emateko azken eguna. Adingabeak direnek gurasoen baimena beharko dute derrigorrez parte hartzeko. Baimen hori egunean bertan emango diete antolatzaileei.
