Ontzi pasaitarren asteburua, gazi-gozoa
'Erreka'-k ez du esperotako hasiera izan Eusko Label Ligan. 'Batelerak' hirugarren izan dira asteburuan jokatutako bi estropadetan, eta onenen pare jarraitzen dute. San Pedro seigarren izan zen atzo Zumaian.
Gizonen ontzia Castron, Espainiako Traineru Txapelketan. Lehian dira jada Pasaiako arraun ontzi guztiak. San Juan-Koxtape Arraun Elkarteko gizonen eskifaia izan da itsasoratu den azkena, asteburu honetan hasi baita Eusko Label Liga. Iaz igoera lortu ondoren, goi mailara itzuli da Erreka, baina ez dute esperotako hasiera izan Joseba Fernandezen arraunlariek. Estreinako estropadan, Bilbon jokatutakoan, azkena izan zen Donibaneko ontzia. Atzo, aldiz, hobeto aritu ziren, eta bederatzigarren postuan sailkatu ziren Sestaon. Lehen bi estropadak jokatuta, sailkapeneko azken aurreko postuan kokatu dira arrosak, 5 punturekin. Hau hasi besterik ez da egin.
ETE Ligan puntako ontzien pare jarraitzen du San Juaneko emakumeen eskifaiak. Liga hasiera bikaina izan dute Anartz Gereñoren arraunlariek, eta asteburu honetan berriz ere erakutsi dute igoeraren lehian izango direla Batelerak. Asteburu honetan jokatutako bi estropadetan hirugarren izan dira arrosak. Zarautz nagusitu da bi jardunaldietan, eta Kaiku bigarren izan da bietan. Asteburuko emaitzekin, Zarautz lidergoan da, 53 punturekin. Batelerak bigarren dira, 48rekin. Kaiku, aldiz, hirugarren postuan da, 43rekin.
KAE1 Ligan estropada bakarra jokatu dute San Pedroko gizonek. Atzo izan zen, Zumaian, eta seigarren postuan sailkatu zen Libia ontzia. Lehen lau estropadetan nagusitu ondoren, Santurtzi zortzigarren izan zen atzo, baina sendo jarraitzen dute lidergoan, 53 punturekin. Sanpedrotarrak sailkapeneko zazpigarren postuan dira, 33 punturekin. Liga hasiera ez da esperotakoa izan Fernando Valenciagaren arraunlarientzat, eta egoera hori irauli nahi dute. Pedreñak irabazi du Zumaiako bandera.
