Erresidentzietako grebak jarraipen zabala izan du
ELA sindikatuak deituta hiru eguneko greba egiten ari dira atzotik erresidentzia eta eguneko zentroetan.
Ekainean egindako hiru greba egunei jarraipena ematen ari dira atzotik bihar arte. Gaurkoan, jarraipen zabala izan duela grebak jakinarazi du ELA sindikatuak. Manifestazioa egin dute Errenteria-Oreretan Sanmarkosene erresidentziatik abiatuta.
Gipuzkoan 5.000 bat langile ari direla sektorean azaldu du sindikatuak, ia denak emakumeak. Oarsoaldea eta Bidasoari begira jarrita, bertan diren zentroen %90 Gipuzkoako Foru Aldundiak finantzatzen duen zerbitzu publikoa izanik lan baldintzak “prekarioak” direla nabarmendu du eta adibideak jarri: langileen %40ak borondatezkoak ez diren kontratu partzialak ditu, “hori enpresa probatu eta irabazi asmorik gabe deklaratzen diren gehienek mozkinak lortu eta negozio logika batean oinarritzen den zaintza sistema eusteko bakarrik esplikatzen da”.
Zaintza sistema “erdigunean” jarri eta zaintzaileen lan baldintzak hobetuko dituen hitzarmena eskatzen duela azaldu du ELAk. Horren barruan sei oinarri ezinbesteko ezarri ditu sindikatuak: Langile guztientzako %100eko jardunaldiko kontratuak; soldata arrakalarekin bukatzea; eta 32 orduko lan astea eskatzen ari dira protestaren bidez langileak.
