Alaitz eta Maider madalenak berotzen hasiko dira
Bikote oiartzuarra izango da hilaren 20ko txistularien kontzertuko gonbidatu berezia. Abesti esanguratsuenak eskainiko dituzte.
Alaitz eta Maider bueltan dira, egun batez bada ere, oholtza zapalduko dute berriro. Madalenen atariko txistulari kontzertuko artista gonbidatuak izango dira, beraz, egun horretan haiek zuzenean entzuteko aukera izango dute, garai bateko une eta abestiak gogoratzeko egun berezia izango da. Gaur iragarri dute kontzertua, Zumardian egindako agerraldiarekin.
Hilaren 20an izango da kontzertu berezi hori, 20:00etan hain zuzen, nola ez, betiko agertokian: Zumardian. Abesti esanguratsuenak eskainiko dituzte Alaitz eta Maiderrek.
Bikote oiartzuarra ez da izango oholtza zapalduko duen bakarra. Bakarlari gonbidatu berezia ere izango da aurtengoan: Izar Imbuluzketa iruindarra ere bertan izango da, Euskal Herriko bakarlarien Txapelduna izan dena azken hiru urteetan. Haiekin batera, noski, txistulari eta musikari mordoa ariko da, hauek hain zuzen: Errenteriako Udal Txistulari taldea, Errenteria eta Euskal Herriko tixstualriak, Xenpelar Bertso Eskola, Ereintza Dantza Taldea, Herri Arte Eskolako dantza garaikideko ikasleak, Xanti eta Maialen, Zaria Abesbatza, Aritz Lonbide (tronpeta), Ricardo Navas (tronpeta), Iñaki Zudaire (saxofonoa), Txomin Gamborena (tronboia), Andoni Garcia (gitarra), Jose Luis Alonso (baxua) eta Imanol Elizasu (teklatua). Garazi Urdanpilletak egingo ditu aurkezle lanak.
Kontzertua biribiltzeko, Isidro Ansorena Donostiako Udaleko Txistulari taldeko zuzendariari omenaldi berezia egingo diote, haren heriotzaren 50. urteurrenean. Berak konposatutako hainbat obra joko dituzte.
Beheko bideoan Errenteriako Udal Txistulari Taldeko zuzendari Xabier Vesgaren eta Alaitz eta Maiderren adierazpenak ikus eta entzun daitezke.
