Santioek aldaketak eragingo dituzte trafikoan eta aparkalekuetan
Santioek trafiko eta aparkaleku aldaketak eragingo dituzte Donibanen, hilaren 24tik 31ra. Bizkaia plazan aparkatzeko baimenak ere eska daitezke, jaietan erabiltzeko.
Gaurtik (hilak 23) hilaren 31ra bitartean Pasaiako azken festak ospatuko dira, Donibaneko santioak. Ospakizunek trafiko eta aparkaleku aldaketak eragingo dituzte barrutian, hilaren 24tik 31ra. Festetako aldaketei buruzko xehetasunak emateaz gain, Pasaiako Udaltzaingoak gogorarazi du hilaren 21etik aurrera jaietan Bizkaia plazan aparkatzeko baimenak eska daitezkeela HAZ bulegoetan. Eskaera horiek Alde Zaharrean eta Bizkaia plazan erroldatutako ibilgailuei begirakoak direla jakinarazi du Pasaiako Udalak, jaietan erabiltzeko. Bizkaia plaza bertakoentzako aparkaleku gisa egokituko da gaurtik hilaren 31ra bitartean.
Hauexek dira aldaketa guztiak:
- Hilak 24, osteguna: 17:30etik aurrera Donibane kalea moztuta egongo da, eta Santiago plaza kotxerik gabe. 19:00etan, trafikoa aldizka moztuko da Meipitik Donibane kalera, erraldoi eta buruhandiei laguntzeko.
- Hilak 25, ostirala: Donibane kalea moztuta egongo da egun osoan, eta Santiago plaza kotxerik gabe. 10:30ean Gaztelutxoko igoera egingo da, eta ordubetez trafikoa aldizka etengo da.
- Hilak 26, larunbata: 12:30etik aurrera Donibane kalea moztuta egongo da, eta Santiago plaza kotxerik gabe.
- Hilak 27, igandea: Donibane kalea moztuta egongo da egun osoan, eta Santiago plaza kotxerik gabe.
- Hilak 28, astelehena: 16:00etatik aurrera Donibane kalea moztuta egongo da, eta Santiago plaza kotxerik gabe. 13:30etik 16:00etara, Meipiko Lezobide kalea moztuta egongo da.
- Hilak 30, asteazkena: Donibane kalea moztuta egongo da egun osoan, eta Santiago plaza kotxerik gabe. 11:00etan haur eta gazteen lasterketa egingo da, eta trafikoa aldizka moztuko da Santiago plazatik Santa Anarantz.
- Hilak 31, oteguna: Donibane kalea moztuta egongo da egun osoan, eta Santiago plaza kotxerik gabe. 11:00etan Bateleren desfilea egingo da, eta zirkulazioa aldizka moztuko da Meipitik Donibane kalera.
