Eraso matxisten aurkako gunea xanistebanetan
Larunbatean (abuztuak 2) hasiko dira Oiartzungo jaiak, eta udalak zenbait zerbitzu egongo direla iragarri du. Eraso matxisten prebentzio eta arretarako guneaz gain, komun publiko gehiago jarri, Xorrola zerbitzua handitu, eta trafikoan aldaketak egongo direla jakinarazi dute.
Iristear dira xanistebanak, eta Oiartzungo Udalak dena prest du jada jaiak ahal bezain hoberen igarotzeko. Hori dela eta, azken urteetan egin bezala, eraso matxisten prebentzio eta arretarako gunea egongo dela jakitera eman dute Nora Velez del Burgo feminismo zinegotziak eta Garazi Urdanpilleta alkateordeak.
Indarkeria matxistan eta feminismoak adituak diren emakume profesionalak egongo dira bertan, udalak adierazi duenez. Alde batetik, informazio orokorra emango dute feminismoari, LGBTBIQ+ eskubideei, sexualitateari edota autodefentsa feministari buruz. Bestetik, herritarrei informazioa emateko esku orri eta bestelako baliabide batzuk izango dituzte. “Edozein zalantza dutenei argibideak eman, erasotuak entzun, babestu eta dituzten beharren arabera gomendioak eta orientazioa eskainiko dituzte”. Erabat “konfidentziala” izango dela eta une oro erasotuaren borondatea errespetatuko dutela azpimarratu dute.
Doneztebe plazako Fermineñe etxean ezarriko dute gunea. Asteburuan, hau da, abuztuaren 2 eta 3an, 12:00etatik 14:30era, 18:00etatik 21:00etara, eta 23:00etatik 06:00etara egongo da irekia. Astean zehar (abuztuaren 4tik 6ra), ordea, arratsalde eta gaueko ordutegia berdin mantenduko da, eta goizekoa 08:00etatik 14:30era arte luzatuko da.
Jaiak bermatzeko beste zerbitzu ugari
Xorrola autobusaren berri ere eman du udalak, 24 orduko zerbitzua emango baitu. Azken urteetan, jaietatik etxera itzultzeko Xorrola hartzeko ohitura “errotu” egin dela ikusita, zerbitzuak nabarmen handitu dituzte. Abuztuaren 3tik 7ra Oiartzungo zortzi auzoak gau osoan zehar lotuko ditu orduro, 00:00etatik 06:00etara.
Aurten, egitaraua xanistebanen lehen egunaren aurretik abiatuko da, ostiralean (abuztuak 1), hain zuzen ere. Hori dela eta, abuztuaren 1etik 2rako gauerako ere zerbitzu bereziak bermatuko dituzte, gaueko autobusa orduro jarriz. Lehen autobusa 01:00etan abiatuko da, eta azkena 04:00etan.
Biblioteka ondoko autobus geltokitik abiatu eta Elizalde, Gurutze, Ergoien, Altzibar, Karrika, Iturriotz, Ibarre, Elizalde, Ugaldetxo, Arragua eta Mendinetik igaroko Xorrola, hurrenez hurren.
Gainera, eguneko Xorrola zerbitzua ere indartu du udalak. 07:10ean abiatuko da lehen itzulia, eta 22:40an azkena. Taxibus zerbitzua ere egunero egongo da, ohiko ordutegiekin.
Gainera, komenigarria izango da Xorrola hartzea jaietan zehar, trafikoan zenbait aldaketa egongo dira eta. Herriguneko kale batzuk moztuta egongo dira, eta xanistebanetan egin ohi dituzten moldaketak egingo dituzte: Manuel Lekuona etorbideko eta Yon Oñatibiako geltokiak Rafael Pikabea eta Landetxera igaroko dira.
Elizaldeko kale batzuetako hondakinen bilketa ordutegian ere eragin dituzte aldaketak jaiek. 09:00etatik aurrera egingo dute bilketa, beraz, 090:00etatik 09:00etara bitartean utzi beharko dira hondakinak zintzilikatzekoetan: igande goizean errefusa, astelehenean organikoa, asteartean ontzi arinak, asteazkenean papera eta kartoia, eta ostegunean organikoa. Hurrengo guneetan izango du eragina: Donibane, Mendiburu, Putxutxoerreka, Aialde, Kontzejupe, Kontzejuerreka eta Rafael Pikabea etorbidean, eta Done Eztebe, Landetxe, Kazkazuri eta Euskal Herria plazan.
Garbitasuna mantentzeko beste neurri bat ere hartu du udalak: komun publiko gehiago jarriko ditu. Txosnaguneko sei metroko modulu sanitarioa mantentzeaz gain, herriko plazan lau metroko beste modulu bat jarriko du, Fermiñene ondoan. Bi eremuak argiztatuak egongo dira, eta bi langile egongo dira gainbegiratzen “erabilera egokia, higienea, segurtasuna eta erosotasuna bermatzeko”. Txosnagune osoa arratsaldetik goizaldera arte egongo da irekia; plazakoa, aldiz, eguerditik gaueko kontzertua bukatu arte.
