Landarbaso Abesbatzak urrezko bi sari lortu ditu Tokyon
Munduko lehiaketa koral ospetsuenetako eta zorrotzenetakotzat hartzen da Tokyon antolatzen den hiru eguneko lehiaketa internazionala. Parte hartu duten bi modalitateetan lortu dute urrezko saria.
Hilaren 25etik 27ra Tokyo International Choir Competition-aren zazpigarren edizioa gauzatu zen Tokyoko Harumi auzoan, eta Landarbaso Abesbatza bikain aritu zen bertan. Parte hartu zuten bi modalitateetan urrezko saria jaso zuten, eta soilik 0,48 puntu falta izan zitzaizkien lehen hiru sarituen podiumera igotzeko.
Munduko lehiaketa koral ospetsuenetako eta zorrotzenetakotzat hartzen da Tokyon antolatzen den hiru eguneko lehiaketa internazionala. Hori dela eta, izandako parte hartzearekin “oso pozik” agertu dira errenteriarrak, “bai lortutako maila artistikoagatik, baita kalitate eta zailtasun handiko programa baten ia-ia akatsik gabeko interpretazioa eskaini izanagatik ere”.
Gaineratu dutenez, “esperientzia ahaztezina” izan da koruko kideentzat, lehiaketak beren ibilbidea eta azken hilabeteetako lana berretsi dituelako. Azkenik, saritutako hiru taldeen maila bikaina aintzat hartu nahi izan dituzte, “benetan ikaragarriak izan baitira”.
-
- Daiichi Seimei Hall areto entzutetsuan egin zen lehiaketa.
Lehiaketan internazionalean parte hartzeaz gain, hilaren 24an Satellite Concert izeneko kontzertuan gonbidatutako abesbatza gisa parte hartzeko aukera izan zuten Landarbaso Abesbatzako kideek. Tokyoko Tsukishima Social Education Center aretoan egin zen, eta bertan euskal eta nazioarteko musika koralaz osatutako programa partekatu zuten.
Kontzertu berean aritu ziren baita ere Sinapalar Bunun Children’s Choir (Txina), Penabur Children Choir (Indonesia) eta Ching Yun Choir (Taiwan). International Choir Competition-en Penabur abesbatzak hirugarren saria lortu zuen haur kategorian eta bigarren saria garaikide kategorian. Ching Yun Choir-ek, berriz, hirugarren postua eskuratu zuen garaikide kategorian.
