Donostiako Klasikoa dela-eta trafiko aldaketak Oarsoaldean
Izenak berak dioen bezala, Donostian hasi eta bukatuko da lasterketa, baina Oarsoaldeko errepideak ere izango ditu protagonista. Eskualdera eguerdian iritsiko da pelotoia.
Larunbat honetarako antolatu dute Gipuzkoako txirrindularitzan erreferente den Donostiako Klasikoa lasterketa. Guztira 211,4 kilometro burutu beharko dituzte parte hartzaileek. Sei mendate igo eta bi sprint izango dituzte kilometro horietan zehar.
Sinadura kontrola 09:55ean izango da eta irteera neutralizatua 11:20ean hasiko da, Tolosa ibilbidean.
Izenak berak dioen bezala, Donostian hasi eta bukatuko da lasterketa, baina Oarsoaldeko errepideak ere izango ditu protagonista. Hori dela eta, eskualdeko trafikoan eragina izango du. Orduak gutxi gorabeherakoak dira, eta beraz, aldaketak jasan ditzakete. Ikus ibilbidea.
Oiartzun:
GI-20 eta AP-8 autobideko hainbat irteeratako adarretan auto ilara puntualak gerta daitezke, Gipuzkoako Foru Aldundiak jakinarazi duenez, errepidea aldi baterako itxita egongo baita. Oiartzungo AP-8ko 11. irteeran 15:20 eta 16:30 aldera gerta daitezke pilaketa horiek.
Pasaia:
Pasaiako Udaltzaingoak jakinarazi duenez Pasai Donibaneko irteera itxita egongo da 13:45etik 15:30era, Jaizkibelera sartzeko bidegurutzetik pasako baita lasterketa.
Era berean, Pasai Antxotik Nafarroa Etorbidera (N-I) doan irteera itxita geratuko da 13:45etik 16:30era. Kasu honetan, Oarso kaleko biribilgunea erabiltzea gomendatu du Udaltzaingoak.
Errenteria:
Errenteriako Udaltzaingoak ohartarazi duenez, Nafarroa etorbidea, eta Larzabaleko biribilgunetik Lezoko biribilguneraino (Galiziako biribilgunea barne (Niessen)) doan errepide zatia itxita egongo dira 15:00etatik 17:00etara.
Beharrezkoak ez diren itxaronaldiak saihesteko gidariei “ordutegia kontuan har dezatela” eskatu die udalak, eta hurrengo gomendioak luzatu ditu: Nafarroa hiribidera joateko ordezko bideak erabiltzea eta GI-636 errepidea eta erdialdeko kaleak erabiltzea.
Azkenik, oinezkoei pasabideak zeharkatzerakoan “arreta handiz” ibiltzeko eskatu die udalak.
