Zizur Nagusian izandako hilketa matxista salatu du Pasaiako Udalak
Hilketa irmo gaitzetsi eta hura salatzeko mugimendu feministak dei litzakeen mobilizazioekin bat egingo dutela aurreratu du udalak.
78 urteko emakume zizurtar baten hilketa matxista “salatu eta irmo gaitzetsi” dute Pasaiako Udalean ordezkaritza duten alderdi guztiek, eta senitarteko zein gertukoei elkartasun osoa adierazi diete. Horrez gain, aurreratu dute hilketa salatzeko mugimendu feministak dei litzakeen mobilizazioekin bat egingo dutela.
“2025ean indarkeria matxistak Euskal Herrian, edo Euskal Herrikoa den, utzitako bosgarren biktima da” deitoratu du udalak. Eta gaineratu dute 2003tik 130 emakume eta 13 haur hil dituela bortxa matxistak.
Gertakari horien aurrean, Pasaiako Udalak, “jendaurrean eta aho batez”, emakumeenganako indarkeriaren aurkako jarrera agertuko dutela berretsi du, eta “erakunde, elkarte eta herritarrok emakumeok indarkeria matxistarik gabe bizi gaitezen” lanean jarraituko dutela adierazi du.
