Ikasturterako egitarau oparoa prestatu du Udal Bibliotekak
Hilaren 8tik aurrera irekiko du bibliotekak jardueretan izena emateko aukera. Berrikuntza gisa, gazteentzako komiki kluba eta irakurketa erraza taldea zabalduko ditu, baita helduentzako testu feministen irakurketa eta mikroipuin tailerra ere.
Indartsu ekin dio 2025-2026 ikasturteari Errenteriako Udal Bibliotekak, jardueren egitarau oparoa antolatu baitu, “herritarrak literaturara, kulturara eta ezagutzara hurbiltzeko xedez”.
Aurreko urteetan bezala, idazleek testuak irakurri eta taldeak horiek partekatzeko literatura solasaldiak egingo dituzte. Baina horrez gain, hainbat berrikuntza antolatu dituzte datozen hilabeteetarako. Batetik, bibliotekak gazteentzako komiki kluba eta irakurketa erraza taldeak zabalduko ditu; bestetik, helduentzako testu feministen irakurketa eta mikroipuin tailerrak martxan jarriko ditu. Adin guztietako jendearentzako jarduerak euskaraz, gaztelaniaz zein ingelesez egongo dira zehaztu du, “bakoitzak bere taldea aurkitu dezan”.
Hilaren 8tik 20ra bitartean egongo da irekia izena emateko epea, eta eskaera kopurua plaza kopurua baino handiagoa izanez gero, zozketa bidez esleituko ditu. Udalaren webgunean eman daiteke izena, baita Lekuona Fabrika eta Aldakoneara hurbilduz edo 943 44 96 35 telefonora deituz ere.
