Oiartzundik ospitalera joateko autobusa eskatu du udalak berriz ere
Aldundiko Mugikortasuneko diputatuarekin bildu zirenetik urtebetera, oraindik inolako urratsik ez egin izanagatik "ezinegona" du Oiartzungo Udalak. Hori dela eta, ez dagoela zertan lehiaketaren emaitzak itxoin beharrik eta ospitalerako autobusa orain jarri daitekeela esan dio alkateak foru diputatuari.
Badira zenbat urte Oiartzungo Udalak eta bertako biztanleek herritik ospitalera joateko autobus zuzena eskatzen dutela. Gipuzkoako Foru Aldundiari linea ezartzeko behin baino gehiagotan eskatu diote, eta “aldundiak ere eskaera begi onez ikusten duela jaso izan da”. Haatik, Joana Mendiburu alkatea eta Garazi Urdampilleta alkateordeak duela urtebete Azahara Dominguez Mugikortasuneko diputatuarekin bilera egin zuten, eta linea jartzeko lehiaketa martxan zegoela eta esleitua arte itxaron behar zela adierazi zien. Urte osoa zain egon ondoren, aldundiak ez duela inolako aurrerapausorik eman adierazi du udalak, “kezkaz”.
Hori dela eta, Mendiburuk eskutitza bidali dio Dominguezi, “linearen inguruko argibide eta konpromiso zehatzak eskatuz”. Gainera, azken hilabeteetan beste herri batzuetan linea berriak ezarri dituztela ikusi du udalak, eta “pozez” hartu dute “lurraldeko garraioa hobetzeko apustua egitea”; baina oiartzuarrek euren eskakizuna noiz beteko duten jakin nahi dute.
Hala, lehiaketaren emaitzak itxoitea ez dela beharrezkoa adierazi du alkateak: “Orain da unea”. “Oiartzuarrek merezi dute ospitaleetara modu eroso eta zuzenean heltzeko aukera, eta eskatzen diogu aldundiari berehala argitu ditzala dituen aurreikuspenak”.
