Sare sozialen bidez erosketak egiteko aholkuak eman ditu kontsumo bulegoak
Erosketak egiteko internet geroz eta gehiago erabiltzen denez, segurtasun aholku ugari zabaldu ditu Oarsoaldeko Kontsumo Bulegoak.
“Internet bidez geroz eta erosketa gehiago egiten direla” ikusirik, merkataritza elektronikoaren inguruko “eskubideak ezagutu” eta “zenbait neurri hartzea” garrantzitsutzat jo du Oarsoaldeko Kontsumo Bulegoak. Izan ere, “badirudi izan behar dugun arreta ez dela [interneteko erosketen] neurri berean handitzen”.
Erosketa egiteko harreman bakarra Whatsapp bidez egiten denean, erosleak ez du telefono zenbakiaz gain beste daturik. Beraz, ez dago erreklamaziorik egiteko aukerarik. Gainera, ez dago enpresa edo pertsona partikular bat den jakiterik; eta horrek eragina du erosketan, ezin baita kontsumoko araudia aplikatu. Bestetik, horrelako erosketak transferentzia bidez ordaindu ohi dira eta saltzaileak ez du egiaztagiririk bidaltzen, eta horrelako ordainketak ezin dira atzera bota. Hortaz, ez da horrelako salmentetaz fidatu behar.
Bestalde, online dendaren batean erosterakoan salmenta eta itzulketa baldintzak ongi kontsultatzea ezinbestekoa dela argitu du kontsumo bulegoak. Hurrengo datu hauek egiaztatzeko aholkua eman du:
- Enpresaren datuak (izena edo sozietatearen izena, IFZ, helbidea, helbide elektronikoa eta harekin harremanetan jartzeko aukera ematen duen beste edozein datu). Enpresak Espainian establezimenduren bat badu, Kontsumo Bulegoan erreklama daiteke.
- Europar Batasuneko beste herrialde batean badago, Kontsumitzailearen Europako Zentroaren bidez erreklama daiteke, baina EBtik kanpo badago, erreklamazioa ezinezkoa izan daiteke.
- Ordaindu beharreko prezio osoa (zergak eta bidalketa gastuak barne) eta ordaintzeko moduak.
- Online dendako webgunearen segurtasun maila zerbitzari seguruaren adierazleak (https://), kandadu itxia edo web orri batzuetan agertzen den giltza erabiliz identifika ditzakegu.
- Erosketa egin ondoren, enpresak eskaera-berrespena bidali behar digu erosketaren datu guztiekin.
- Entregatzeko epea 30 egunekoa da gehienez. Epe hori igarota, enpresak dirua itzuli behar digu, atzerapenik gabe.
- Produktua jaso ondoren, gutxienez 14 eguneko epea dugu itzultzeko inolako arrazoirik eman gabe (itzultzeko eskubidea). Enpresak itzuli egin behar digu ordaindutako prezioaren kantitatea, bidalketa-gastuak barne, baina baliteke itzulketaren gastuak gure gain hartu behar izatea.
- Enpresa saltzaileari buruz beste erabiltzaile batzuen informazio eta iritziak bilatzea komeni da, haren fidagarritasuna hobe ezagutzeko.
