Eman daiteke izena Pasaiako Udal Euskaltegian
Hilaren 19ra arte egongo da inskribatzeko aukera. A1 eta C1 maila arteko eskolak eskaintzen dituzte. "Prezio publiko merkeak" dituzte.
Euskara erritmo bizian lelopean, Pasaiako Udal Euskaltegiak jakinarazi du zabalik dagoela bertan izena emateko epea, eta hori hilaren 19ra arte (ostirala da) egin daitekeela. A1 eta C1 maila arteko eskolak ematen dituzte 16 urtetik gorakoentzat, 7:00etatik 21:00etara. Hala ere, azpimarratu dute txandaka lan egiten dutenei egokitutako txandakako saioak ere badaudela. Eskaintza guztiak egokituta daude ikasten hasi, ziurtagiriren bat egiaztatu edota maila hobetu nahi duten ikasleek horretarako aukera izan dezaten.
Era berean, jakinarazi dute eskola gehienak egunean bi ordukoak direla, baina 12 urtetik beherako haurrak dituzten familientzat, merkataritentzat, erretiratuentzat edota ahozkoa landu nahi dutenentzat beste aukera batzuk ere badaudela. Hots, doako ikastaro trinkoak eskaintzen dituzte langabezian daudenentzat edota DBE zein gizarte laguntzaren bat jasotzen dutenentzat.
Gainera, autoikaskuntza sistema ere badute. Aukera horrekin lana bakarka egiten du ikasleak, betiere tutore batek gidatuta. Hamabost egunean behin tutoretza saioak egiten dituzte egindako lanak zuzentzeko edota zalantzak zein zailtasunak argitzeko. Alabaina, mintzamena modu presentzialean egiten da euskaltegian bertan.
Eskolez gain, klaseen osagarri modura, barne nahiz kanpo ekintzak ere antolatzen dituzte “ikasleeak motibatzeko eta hizkuntza praktikatzeko aukera izan dezaten”.
Pasaiako Udal Euskaltegiak “prezio publiko merkeak” ditu batez ere langabezian daudenentzat, 16-30 urte bitarteko gazteentzat eta hasierako mailetan matrikulatzen diren ikasleentzat. Gauzak horrela, ikastaroa amaitu, euskaltegiko ebaluazio probak egin eta %85eko asistentzia duten pasaitarrek ordaindutakoaren %100 berreskuratuko dute. Horretaz gain, 12 urtetik beherako haurrak dituzten gurasoek tarifa murriztua izango dute, eta matrikularen %100 itzuliko zaie bete beharreko baldintzak betetzen badituzte, behintzat.
Informazio gehiago nahi duenak edota izena eman nahi duenak euskaltegira bertaratzeko aukera dauka 08:000etatik 19:00etara; hala ere, 943 00 43 40 zenbakira deitu edota mezu elektroniko bat bidaltzea ere posible da.
