Bide Berria proiektua, "marketin kanpaina" dela dio PSE-EEk
Prentsa ohar bidez azaldu du bere desadostasuna, joan den ekainean egin zuen moduan.
PSE-EEko Almudena de La Torre eta Isaac Palencia.PSE-EE Topoa udalerrian integratzeko Bide Berria proiektua marketin kanpaina instituzional hutsa dela salatu du PSE-EEk. Prentsa ohar bidez azaldu du bere desadostasuna, joan den ekainean egin zuen moduan, “EH Bilduk bultzatutako proiektuak porrot egin du hiri eraldaketarako alternatiba gisa, ez baitu oinarri teknikorik, ez finantziaziorik, ezta herritarren babesik ere”.
EH Bildu dela proiektuaren bultzatzailea esan dute sozialistek, baino Bide Berria proposamena udalean ordezkaritza duten bost alderdi politikoetatik lauk babestu dute: EH Bilduk, Elkarrekin Podemosek, EAJk eta PPk, eta hura aurkezteko prentsa agerraldian alderdi horietako guztietako ordezkariek hartu zuten parte. Auzoetan egindako aurkezpenetan ere aritu ziren.
Proiektuaren atzean “plano bat eta paper bat” baino ez daudela diote sozialistek, eta topoa udalerrian integratuko duten bi “ekintza gako” martxan direla: “Galtzarabordako topoa estaltzeko eta Gaztañoko trenbide pasabidea ezabatzeko proiektuak esleituta daude jada. Bide Berria proiektua hutsegitea izan da hasieratik, egiten zuen proposamen berritzaile bakarra, trenbidearen kaptsulatzea, bertan behera gelditu da bizilagunen babesik ez duelako izan”.
