"Parte hartu dudan txapelketarik onena izan da"
Jada Lezon, Kayak Surfeko Europako Txapelketan egindakoaren balorazioa egin du Aiur Illarreta Beñaranek. Oso maila handiko lehia izan dela nabarmendu du.
Jada Euskal Herrian, Lezon da Aiur Illarreta Beñaran kayak surf kirolaria. Irlandako Europako Kayak Surf eta Waveski Txapelketan bakarka bi urrezko domina lortu ondoren atsedenerako egunak ditu orain. Santakrutzak gogoz hartuko ditu. Etxean jada lasai, HITZArekin hitz egiteko aukera izan du kirolari gazteak: “Txapelketa oso polita izan da. Ni izan naizenetatik, mailarik gehien izan duen txapelketa dela uste dut. Normalean final-laurdenak arte ez da zailtasunik egoten aurrera egiteko, baina oraingoan final-laurdenetako txandaren aurretik egin nuen txandan oso zail izan nuen aurrera egiteko; ia final bat ematen zuen. Esan nahi dudana da oso maila altua izan dela”. Beraz, erraza badirudi ere, izerdiz lortu ditu urreak Illarretak.
Giro ona izan dute Irlandako Easkey herriko Europakoan. Lehia bai, baina kirolarien arteko giroa ederra izaten da. Hala berretsi du lezoarrak txapelketak utzi dion arrastoaren gaineko gogoeta egiterakoan: “Oso pozik nago. Ez bakarrik emaitzengatik. Denekin oso giro ona izan dugu, olatu bikainak izan ditugu, eta konpetizioak dituen gora beherekin bada ere, giroa oso ona izan da. Gozatua izan da partaide askorekin hitz egin izana, giro jatorrean. Kexarik edo jarrera ezkorrik ez da izan. Eta horri, esan bezala, lortu ditudan emaitzak gehitzen badizkiogu, izan naizen txapelketarik politena izan da Irlandakoa”.
Beti plazera da Euskal Selekzioarekin aritzea harentzat. Hala baietsi du. “Horrelako bidaia bat euskaldunekin egin ahal izatea, eta Euskal Selekzioko kide izatea, beti da plazera. Horri emaitza politak lortu ditugula erantsi behar zaio. Egia da aurrekoetan baino gehiago kostatu zaigula emaitzak lortzea, Frantziak adibidez talde polita zuelako, edo Ingalaterrak eta Irlandak ere maila handiko partaideak zituzten”.
Europakoaren ondoren, arnas hartzeko tartea hartuko du orain goi mailako kirolariak. Lezoko Santakrutz Festetan askatuko du lehian izandako tentsioa: “Orain bai. Uda osoan entrenatzen egon ondoren, eta itsasoan ordu pila sartu ondoren, herriko festetan gozatzea tokatzen zait. Hilabete honetan hainbat parranda ditugu, eta aprobetxatu beharko da entrenatzen berriz ere hasi aurretik”.
