Jaietan sortutako 'zarata arazoengatik' kezka azaldu du EAJk
Madalenetan zein bukatu berri diren Beraungo jaietan "gehiegizko zarata" sortu dela-eta kexa zabaldu dutela bizilagunek azaldu du EAJk prentsa ohar bidez.
Madalenetan zein bukatu berri diren Beraungo jaietan “gehiegizko zarata” sortu dela-eta kexa zabaldu dutela bizilagunek azaldu du EAJk prentsa ohar bidez. Horren aurrean, kezka azaldu du alderdi jeltzaleak, “badakigu gure herri tradizioak eta ospakizunak bizirik mantentzea oso garrantzitsua dela; baina aldi berean, funtsezkoa iruditzen zaigu herritar guztien bizikidetza eta errespetua bermatzea”.
Hori horrela, atsedenerako eskubidea eta jaiak gozatzeko eskubidea “bateragarria” izan behar duela babestu du. Adinekoen, haur txikiak dituzten familien, eta auzotarren iruzkinak jaso dituztela azaldu du EAJk, “arrazoi pertsonalak edo lanekoak direla-eta, ordu txikitan zarata maila bereziki handiak eragin dielako”. Halako egoerak “hobe araututa” egon behar luketen iritzikoa da eta horrenbestez, uste du, jarduerak baimentzeko irizpideak “berrikusi” beharra dagoela, “bereziki gaueko ordutegian musika edo zarata eragiten dutenak”.
Proposamena luzatu du azkenik alderdi horrek inplikatutako eragile guztien arteko hausnarketa prozesu bat abiatzeko: “Udala, jai batzordea, auzo elkarteak eta herritarrak batu eta hausnartzen jartzea proposatzen dugu etorkizuneko jaiak gozamen kolektiborako guneak, inklusiboak, iraunkorrak, eta batez ere, pertsona guztien atsedenerako errespetatzen dutenak izan daitezen”.
