Tokiko moneta sozialaren proiektu pilotua aurkeztuko dute jendaurrean
Lezon izango da lehen aurkezpena, hilaren 23an; Errenteria-Oreretan egun bat geroago egingo dute.
Euskoekin ordainketa eginda.Imanol Saiz Gomez de Segura Tokiko moneta sozialaren proiektu pilotua aurkezten hasiko dira hilabete honetan bertan Oarsoaldean. Zehazki, Lezon eta Errenteria-Oreretan eramango dute proiektua jendaurrera. Hilaren 23an izango da aurkezpena Lezoko Kultur aretoan 18:00etan hasita; eta egun bat geroago, hilaren 24an, Errenteria-Oreretako Reina aretoan 18:00etan.
Ipar Euskal Herrian 12 urte daramate Euuskoa erabiltzen, eta gaur gaurkoz, Europako tokiko monetarik garrantzitsuena bihurtu da. Euskoaren esperientzia horretan oinarrituta, Hego Euskal Herrian tokiko monetaren proiektua martxan jarriko da eta bi eskualdetan egingo dira proiektu pilotuak: Oarsoaldean eta Baztanen.
Proiektuaren atzean Gizartearen Moneta dago. Haren esanetan tokiko ekonomia eta harreman sozialak indartzeko tresna da, “eta Oarsoaldean hasiko den proiektu pilotuak bide eta aukera berriak zabalduko ditu arlo ekonomiko eta sozialean”. Tokiko monetaren proiektua Oarsoaldeko herri bakoitzaren ezaugarrietara egokitu beharko dutela ere azaldu du elkarteak, “Oarsoaldea, eremu anitza eta urbanoa baita, berezko ezaugarri eta komertzio eta zerbitzu eskaintza zabalarekin”.
Tokian tokiko egokitzapen lan hori tokiko eragileekin elkarlanean egin nahi dutela azaldu du.
Lehen aurkezpen bilerak, esan moduan, Errenteria-Oreretan eta Lezon izango dira, ondoren helduko dira beste herrietara. Antolatzaileek gonbidapena egin diete herriko eragileei zein interesa duten herritarrei bertara daitezen.
