Lezo Bonuak, berriz ere martxan
Lehenik, herrian erosketak egiteko aurrezki bonuen kanpainarekin bat egin nahi duten establezimenduek izena eman behar dute. Urritik erabili ahal izango dituzte bonuak herritarrek.
Lezo Bonuak berriz ere martxan jarriko dituzte. Lehenik eta behin herrian erosketak egiteko aurrezki bonuen kanpainan nork parte hartu nahi duen zehaztu behar da, eta horri begirako izen emate epea zabalik da: Lezoko denda, komertzio, ostalaritza gune edo zerbitzuen eremuko negozioei izena eman dezatela eskatu diete Leozko Udalak eta Lezokoak Merkatari, Ostalari et Zerbitzu elkarteko kideek; Oarsoaldea Garapen Agentziaren babespean abiatu dute kanpaina. Hala, establezimenduei begirako izen ematea zabalik da, hilaren 29ra arte. Eskaera hori online (ziurtagiri digital bidez) egin behar dute interesdunek: baliatu esteka hau eskaera atarira joateko. Deialdiaren oinarri zehatzak ikusteko sakatu hemen.
Oarsoaldea Garapen Agentziak jakinarazi du laguntza emango diela hala nahi duten establezimendu guztiei. Bonuen kanpainan parte hartzeko tramitazio lana egin behar da, eta zeregin horretan agentziaren babesa izango dutela azaldu dute: 943 49 41 29 telefono zenbakira dei dezakete denden edo negozioen arduradunek, edo posta elektronikoa ere balia dezakete.
Behin bonuak erabili ahal izango diren establezimenduen zerrenda osatuta, bonuak erabili ahal izateko epea zabalduko da. Txartel edo bonu bakoitzak 3,5 euroko prezioa izango du, eta horietako bakoitzarekin 5 euroko balioa (gutxienez) duen erosketa egin ahal izango da; 1,5 euroko tartea Lezoko Udalak hartuko du bere gain. 18 urtetik gorakoek bakarrik eskuratu ahalko dituzte bonuak: urriaren 13tik azaroaren 30era arte izango dira indarrean. Bonuak, horiek erosi diren establezimenduetan erabili behar dira, eta erosi dena bonuen zenbatekoa baino txikiagoa bada, diru alde hori ez da inolaz ere eskudirutan itzuliko. Gutxienez bost euroko erosketak egin behar dira bonuaren deskontuaz baliatzeko.
Aurrerago emango dute kanpaina parte hartuko duten establezimenduen zerrenda.
