Liburu-dendek ere aitortu dute Karmele Mitxelena
Gipuzkoako liburu dendek ematen duten Zilarrezko Euskadi Saria irabazi du oiartzuarrak, 'Zoriona, edo antzeko zerbait' lanagatik.
Karmele Mitxelena Etxebeste. Aste oparoa Karmele Mitxelena Etxebeste oiartzuarrarentzat. Astelehenean haur eta gazte literaturako Euskadi Sariaren jabe izango dela iragarri zuen Eusko Jaurlaritzako Kultura Sailak; atzo, berriz, Gipuzkoako Liburu-denden Elkarteak jakinarazi zuen haien Euskadi Zilarrezko Saria Mitxelenarentzat izango dela euskarazko lanen atalean, Zoriona, edo antzeko zerbait sorkuntzagatik. Hilaren 22an jasoko du aitortza hori, Donostiako Errabundia liburu-dendan egingo den ekitaldian.
Herrialdeko liburu-dendek urtero ematen duten sariaren xedea da argitalpen kopuru osoaren barruan bigarren maila batean geratu diren lanak nabarmentzea, “Sari hauen bidez, kalitate literarioa aitortzeaz gain, arreta handiagoa merezi duten tituluen zirkulazioa bultzatu nahi dugu”.
Saritutako lanak idazkera “lasai eta hurbila” duela azaldu dute elkartekideek, prosa “eraginkor eta zuzena” erabiliz, heriotzaren eta suizidioaren tabuari aurre egiten dioten bizitzen inguruko eleberria landu du. “Bidaia fisiko eta psikologiko baten kontakizuna da, zoriontasuna helburu ala bide gisa ulertzeko galdera; heriotzaz eta erruaz, familiaren eta maitasun- eta adiskidetasun-harremanen hausnarketa gisa. Bizitzearen eta sentitzearen kontraesanen iluntasun gordinaz eta argitasunaz dihardu”. Zoriona, edo antzeko zerbait egiteko Agustin Zubikarai beka jaso zuen Mitxelenak 2023an.
Beste sarituak
Gaztelaniazko literaturaren atalean Laura Chiviteren El ataque de las cabras lana saritu dute liburuen salmentarako establezimenduek. Komikien edo album ilustratuen saria, berriz, Joe Saccori eman diote Gerra Gazan lanagatik, Julen Gabiriak euskarara ekarria.
