Rafael Pikabea etorbidean berrikuntza garrantzitsuak egingo ditu Oiartzungo Udalak
Mugikortasun jasangarria eta oinezkoen segurtasuna ardatz hartuz, hainbat aldaketa egingo dituzte etorbidean zehar.
Rafael Pikabea etorbidea eraberrituko du udalak, 646.765 euroko aurrekontuarekin. Udalarena den errepide nagusi bakarra da Rafael Pikabea etorbidea, herrian dauden besteak Gipuzkoako Foru Aldundiarenak baitira. Horregatik, udalak uste du eraberritzea beharrezkoa dela, herritarren mugikortasunerako ardatz garrantzitsu bat delako.
Berrikuntza lanak martxan dira jada, eta Mateoko bidegurutzetik herriko plazaraino luzatuko dira. Lanak Mugikortasun Planaren arabera egingo dira. Eraberritzearen xedea mugikortasun jasangarria sustatzea da. Etorbidean bi autobus geltoki egokituko dira, bat Mateo inguruan eta bestea Tolarieta inguruan. Horrez gain, zebra bideak eta espaloi zatiak hobetzen jarraituko du udalak, “oinezkoentzako bide seguru eta erosoak sortzeko”.
Errepideko zuloak konpontzen dabil udala, eta era berean, Pikabeneko biribilgunean ere konponketa lanak ikus daitezke. “Biribilguneko lanekin autoek abiadura zaintzeko aukera izango dute, oinezkoentzako leku seguruagoa izan dadin”.
Soilik oinezkoentzat
Lan garrantzitsuenak etorbidearen azkeneko zatian egingo dira. Tolarietako aparkalekuak “egoera txarrean” daude udalaren ustez, eta horregatik, eremu hori txukuntzeko apostua egingo dute. Rafael Pikabea etorbideko azken zatia oinezkoentzako bidea bilakatuko dute, espaloiari jarraikortasuna emateko, eta bertan kokatuko da taxi geltokia. Lanak bukatzerakoan ibilgailuek ezingo dute bertatik pasa. Horren ondorioz, anbulatoriotik gora doazen automobilek Ion Oñatibia kaletik atera beharko dute.
