Errenteriak 2,4 milioi euroko laguntza lortu du Europako funtsetatik
Tokiko Garapen Integratuko Estrategiak finantzatzeko FEDER funtsetara aurkeztu dira, eta finantziazioa eskuratu duten Gipuzkoako udalerri bakarrak izan dira Oarsoaldeko lau herriak.
Pasa den otsailean Oarsoaldeko lau udalek Tokiko Garapen Integratuko Estrategiak finantzatzeko FEDER funtsetara hautagaitza aurkeztu zuten, eta ostiralean jaso zuten emaitza. Errenteriako Udalak 6,8 milioi euroko inbertsio plana aurkeztu zuen, eta 2,4 milioi euroko laguntza lortu du 2025 eta 2029 urteen artan garatzeko. Aipatu beharrekoa da Gipuzkoan funts horien finantziazioa lortu duten herri bakarrak direla Oarsoaldekoak.
Berriki dirulaguntza onartu dutenez, inbertsio planaren %35 baino gehiago finantzatuko dute, 2,4 milioi euro jasoko baitituzte FEDER funtsetatik.
Udal Gobernuko ordezkariek agerraldia egin dute gaur goizean Galtzarabordako Urdaburu parkean, eta Aizpea Otaegi alkateak bultzada ekonomikoaren garrantzia azpimarratu du. “Bultzada ekonomiko hori garrantzitsua da bi dimentsiorengatik; batetik, erakusten duelako udalaren kudeaketarako gaitasuna zein funtsak eskuratzeko gaitasuna, eta, bestetik, agintaldi planean jasotako proiektu estrategikoek bultzada garrantzitsua jasoko dutelako eta, beraz, guk jasotako helburuak betetzeko gaitasuna erakusten duelako”.
Otaegik azaldu duenez, aurkeztutako inbertsio planak lau helburu jasotzen ditu: Arditurriko bide berdea hobetzen jarraitzea, tokiko merkataritza indartzea, azpiegitura sozial berriak garatzea eta ekipamendu komunitario berriak martxan jartzea. Era berean, alkateak nabarmendu du Galtzaraborda biziberritzeko plana garatzeko “mugarria” izango dela lortutako finantziazioa, aurkeztutako inbertsio planeko proiektu handienak Galtzaraborda biziberritzeko planean jasotakoak baitira.
Bide horretan, dio auzoko azpiegitura berdea garatzeko eta, beraz, parkea eraberritzeko 3.120.601 euroko inbertsioa jasotzen duela planak; 1.009.384 euroko inbertsioa eraberritze urbanorako, eta, Haurreskola berriaren eraikuntza finantzatzen ere lagunduko lukeela azaldu du diru laguntza horrek.
Errenteriako Udalak uztailean iragarri zuen Haurreskola berria eraikiko duela Galtzaraborda, eta dagoeneko proiektuaren idazketa eginda dago; alabaina, “lizitatzear” daude. “Gure aurreikuspena da urte berriarekin batera obrak hastea”, jarraitu du alkateak.
FEDER funtsen bidez sustatuko duten bigarren proiektu edota esparru estrategikoa tokiko ekonomia indartzea izango da, eta azpimarratu dute kasu horretan Beraungo merkataritza eremua biziberritzeko proiektua aurkeztu dutela. 2027. urtean garatzeko proiektua litzatekeela zehaztu du Otaegik, eta horretarako 642.000 euroko inbertsioa egitea jasotzen duela planak “bereziki merkataritza eremua biziberrituz edota ingurune horretan esku hartze esanguratsuak eginez”.
Finantzatuko duten hirugarren ildoa Arditurriko bide berdea, eta kasu horretan 678.368 euroko inbertsioa aurreikusi dute. Zehaztu dute lanak erdigunean eta Alabergan egitea aurreikusten dutela.
Hitzartzearen amaieran Otaegik azpimarratu nahi izan du eskualde mailako proposamena izan dela funts horietara aurkeztea, eta lau udalek elkarlanean erabaki eta bideratu dutela proiektua. Are, nabarmendu du eskualderako orotara 14,4 milioi euroko inbertsio plana aurkeztu zutela.
